Read Hmar INPÂKNA HLA BU 109 Bible Online

INPÂKNA HLA BU 109 - Hmar bible

INPÂKNA HLA BU 109

¹Hla ṭhuoitu ta dingin: David Inpâkna Hla. Aw kan inpâk Pathien, to zing naw la,

²Mi rilo bau le bau mi hlêmhmang chu ka chungah an ka si a; Anni chun lei khêlinhlipin ka kuomah thu an hril a.

³Theidâna thuin a mîn huol vêl a, Ieng ni bar lovin an mi do a.

⁴Ka lunginsiet leiin a mi dotuhai an hung ni ta a; Nisienlakhawm, kei chu ṭawngṭâi dingin kân pêk tlat a.

⁵Anni chun thil ṭha chu thil suolin an mi thung a, Ka hmangaina chu theidanain an mi thung bawk a.

⁶Nangin a chungah mi suol sie la, A changtieng chun hêktu ngîr raw se.

⁷Rorêlpêka a um pha thiemlo changin suok sienla, A ṭawngṭâina suolnaah inchang raw se.

⁸A dam sûng nihai chu hung tlâwm sienla, A hotu nina chu mi dangin chang raw se.

⁹A nauhai chu pa boin um sienla, A nuhmei chu hmeithaiin um bawk raw se;

¹⁰A nauhai chu mi invâi hung niin kut daw sienla, An fâk ding chu an hmun hluihaia chun zawng raw se.

¹¹A pung hnawta tangka inpûktirtu chun a nei po po chu lâkpêk vawng sienla, Mikhuolhai chun a sininrim ra chu lâkpêk raw hai se.

¹²A chunga ngilneina inlangtir pei dingtu tukhawm um naw sienla, A nau, pa bohai chu lunginsiettu ding tukhawm um bawk naw raw se.

¹³A thlahai chu sukbohmangin um sienla, Ruolthar hung um nâwka chun an hming chu thai hmangin um raw se.

¹⁴A thlatuhai rîtlona chu LALPA kuomah hriet zingin um sien la, A nu suolna chu thai hmangin um naw raw se.

¹⁵Chuonghai chu LALPA hmaah um naw sienla, Ama chun anni hriet zingna chu hnuoia inthawka a sukbo theina dingin.

¹⁶Zâinêmna inlangtir nachâng a hriet naw a, Mi rimsi, pasie le lungriem ithlâkhai chu sukhlum tuma, a suknawmna lem hlak leiin.

¹⁷Anih, mi ṭawngse inphur hi a nuom zawng a na; chuongchun, ama chungah a hung tlung a, Mi malsâwmpêk hi a lâwmzâwng a ni naw a; chuongchun, ama ihlat daiah a um a.

¹⁸Kawrfuola inthuom angin, ṭawngse inphurnain ân thuom a, Chu chu a sûngahai chun tui angin a lût a, A ruhaia chun hriek angin a lût bawk a.

¹⁹Chu chu a ta dingin ân belna hlak silfên angin um sienla, A în khit rawpna kâwngkhi ni bawk raw se.

²⁰Chuong chu a mi dotuhai le ka hringna hrilsetuhai, LALPAIN a thungna a na.

²¹Nisienlakhawm, aw Pathien LALPA, nangin i hming leiin mi thawpui la, I ngilneina chu a ṭhat leiin mi sanhim rawh.

²²Rimsi le pasetak ka ni a, Ka lungril hi ka sûngah inhliemin a um bawk si a.

²³Hlim botieng intung tah ang hin ka bo a, Khâuṭhikṭhi ang hin lên hmangin ka um a.

²⁴Ka khûphai hi bu nghei leiin a hrât ta naw a, Ka taksa hin thâu hrim a put ta nawh.

²⁵Anni ihrilsiet ka lo ni ta a, An mi hmu phingleh an lu an thin hlak.

²⁶Aw LALPA ka Pathien, mi ṭhangpui la, Aw i ngilneina ang peiin mi sandam rawh.

²⁷Chu chu i kut a nih ti an hriet thei a, LALPA, nangin i thaw a nih ti an hriet theina dingin.

²⁸Anni chun ṭawngsie inphur raw hai se, nang ruok chun malsâwm lem rawh, An tho phingleh muolpho an ta, i siehlaw ruok chu hlim a tih.

²⁹A mi dotuhai chu inzakna puon insiltirin um hai sienla, Zakuoa intuom angin, anni muolphona chun intuom raw se.

³⁰Ka bau hin LALPA kuomah lâwmthu nasatak hril ka ta, Anih, mipui laia chun ama chu inpâk ka tih.

³¹Ama chu pase changtieng chun ngîr a ta, A hringna rorêlpêktuhaia inthawka sandam dingin.