Read Hmar INPÂKNA HLA BU 111 Bible Online

INPÂKNA HLA BU 111 - Hmar bible

INPÂKNA HLA BU 111

¹LALPA chu inpâk ro, Mi indiktakhai inkhâwmnaa le inrâwn khâwmnaa chun, Ka lungril po povin LALPA kuomah lâwmthu hril ka tih.

²LALPA thilthawhai chu a ropui a, A chunga lâwmhai poin zawng suok a ni hlak.

³A sinthaw chu inza a umin a ropui a nih, A felna chu kumkhawtluonga um ding a nih.

⁴Ama chun a thilmak thawhai chu ân hriet zingtir a, LALPA chu mi lunginsiet theitak, lainatnaa sip a nih.

⁵Ama ṭituhai kuoma chun fâk ding a pêk a, A thuthlung chu kumkhuoin hre zing a tih.

⁶A thilthawhai thilthawtheizie chu a mihai kuomah ân langtir a, Hnam tin rochan chu an kuoma pein.

⁷A kut thilthawhai chu thutak le rorêlna fel a na, A thununna thu po pohai chu ring a um a nih.

⁸Chuong chu kumkhawtluonga dingin sukdetin a um a, Thutak le indiktaka thaw a ni tâwl a.

⁹Ama chun a mihai kuomah intlanna a hung tir a, A thuthlung chu kumkhuoa dingin a ruot a, A hming chu ân thiengin inza a um a nih.

¹⁰ LALPA ṭina chu varna bul a na, Chuong anga thaw taphawthai chun hrietthiemna ṭha an nei a. Ama inpâkna chu kumkhawtluonga um ding a nih.