Read Hmar INPÂKNA HLA BU 116 Bible Online

INPÂKNA HLA BU 116 - Hmar bible

INPÂKNA HLA BU 116

¹LALPA chu ka hmangai a nih, ka râwl le Lunginsiet ka hninahai chu a ngai leiin.

²Keia tieng a na a hung sit leiin, Ka dam sûng po po chun ama chu ko ka tih.

³Thina hruihruolhai chun an mi zem a, Seol natnahai chun a mi man a, Lunginzîngna le lungngaina ka tuok a.

⁴Chu phingle chun LALPA hming chu ka ko a, “Aw LALPA, lunginsiettakin ka hringna hi sanhim rawh,” tiin.

⁵ LALPA chu mi lunginsietthei le feltak a na, Anih, ei Pathien chu mi lainattheitak a nih.

⁶LALPA chun mimâwlhai chu a humhim hlak a, Sukhnuoiin ka um a, ama chun a mi sandam ta a,

⁷Aw ka hringna, i châwlnaa chun kîr nâwk rawh, LALPA chun i chungah ṭhatakin a thaw ta si a.

⁸Ka hringna hi thinaa inthawkin, Ka mithai hi mitthlia inthawkin, Ka kehai hi tlûknaa inthawk chun i sanhim si a.

⁹Mi hring rama hin, LALPA hmaah lêng ka tih.

¹⁰Ka ring a, thu ka hril ding a ni hi, Nasataka sukrinumin ka um kha.

¹¹Ka hamhaiin, “Mi po po khêl an nih,” ka lo ti ta a.

¹²Ka chunga a thil thaw ṭhat po po hi, LALPA kuomah ieng am pe ve thung ka ta aw?

¹³Sandamna no lâng ka ta, LALPA hming chu ko ka tih.

¹⁴Ka thutiemhai chu LALPA kuomah hlen ka ta, Anih, a mihai po po hmaa chun.

¹⁵A mi inthienghai thina chu, LALPA ngai chun hlutak a nih.

¹⁶Aw LALPA, i siehlaw ka ni tak zet el, I siehlaw i suoknu naupa chu ka na, Khuopa ka umnahai chu i mi sût ta a.

¹⁷Lâwmthuhril inthawinahai chu inhlân ka ti che a, LALPA hming chu ko ka tih.

¹⁸Ka thutiemhai chu LALPA kuomah hlen ka ta; Anih, a mihai po po hmaa chun,

¹⁹LALPA biekin inhuonna sûng tuollaiah, Aw Jerusalem, i laitaka chun. LALPA chu inpâk ro.