Read Hmar INPÂKNA HLA BU 118 Bible Online

INPÂKNA HLA BU 118 - Hmar bible

INPÂKNA HLA BU 118

¹Aw, LALPA kuoma lâwmthu hril ro, ama chu a ṭha si a, A ngilneina khawm kumkhawtluongin a um ding a ni si a;

²A ngilneina chu kumkhawtluongin a um ding a nih ti, Israelhai chun hril raw hai se.

³A ngilneina chu kumkhawtluongin a um ding a nih ti, Aron sûnghai chun hril raw hai se.

⁴A ngilneina chu kumkhawtluongin a um ding a nih ti, LALPA ṭituhai chun hril raw hai se.

⁵Ka lunginzîngnaa inthawkin, LALPA chu ka ko a, LALPA chun a mi dawn a, hmun inthâwl takah a mîn umtir ta a.

⁶ LALPA chu keia tienga ṭhang a nih, ṭi naw ning: Mihriemin ieng am mi law thei an ta?

⁷LALPA chu keia tienga ṭhang, a mi ṭhangpuituhai laia mi a nih, Chuleiin, a mi theidatuhai chunga ka duthusâm chu hmûng ka tih.

⁸Mihriem ring nêk chun LALPAA ringna innghat hi a ṭha lem a nih.

⁹Lalhai ring nêk chun, LALPAA ringna innghat hi a ṭha lem a nih.

¹⁰Hnam tinrêngin an mîn huol vêl a, Anni chu LALPA hmingin sukbohmang ka tih.

¹¹Anni chun an mîn huol vêl a, anih, an mîn huolvêl a, Anni chu LALPA hmingin sukbohmang ka tih.

¹²Khuoihai angin an mîn huol vêl a, hling chawk anga sukrêmin an um a, Anni chu LALPA hmingin sukbohmang ka tih.

¹³Ka tlûkna dingin natakin i mi sun ngei a, Nisienlakhawm, LALPA chun a mi ṭhangpui ta hlau a,

¹⁴LALPA chu ka hrâtna le ka hla a nih, A mi sandamtu a lo ni ta bawk a:

¹⁵Lâwmna le sandamna ri chu mi felhai puon inah a um hlak a, LALPA kut changtieng chun huoitakin a thaw hlak.

¹⁶LALPA kut changtieng chu chawimawiin a um hlak a, LALPA kut changtieng chun huoitakin a thaw hlak.

¹⁷Thi naw ning a, dam ka ta, LALPA thilthawhai chu inhriettir lem ka tih.

¹⁸ LALPA chun nasatakin a mi thunun a, Thina kuoma ruok chun a mi pêk êm nawh.

¹⁹Felna kul kawtkhârhai hi mi hawngpêk unla, Hienga hin lût ka ta, LALPA kuomah lâwmthu hril ka tih.

²⁰Hi hi LALPA kawtkhâr a nih. Mi felhai chu lût an tih.

²¹I kuomah lâwmthu hril ka tih, nangin i mi dawnin, A mi sandamtu i lo ni ta si a.

²²In bâwltuhai lung dit naw kha, A kila lung ṭhangkaitak a lo ni tah.

²³Chu chu LALPA thaw a na, Ei mithmuah a mak a nih.

²⁴Hi hi LALPA ni ruot chu a nih, Hi ni hin hlimin lâwm ei tiu.

²⁵Aw LALPA, kan ngên che, tuhin sandam la, Aw LALPA, kan ngên che, tuhin vângneina hung tir rawh.

²⁶ LALPA hminga hung chu a hamṭha ie, LALPA ina inthawk hin mal kan sâwm cheu a ni hi.

²⁷LALPA chu Pathien a nih, ama chun var a mi pêk a, Inthâwina ding chu hruihruolin thlung ro, maichâm kihai ngeia chun.

²⁸Nang chu ka Pathien i na, lâwmthu hril ka ti che a, Ka Pathien i na, chawimawi ka ti che.

²⁹Aw LALPA kuomah lâwmthu hril ro, ama chu a ṭha si a: A ngilneina khawm kumkhawtluonga um ding a ni si a.