Read Hmar INPÂKNA HLA BU 119 Bible Online

INPÂKNA HLA BU 119 - Hmar bible

INPÂKNA HLA BU 119

¹Kawnglama mi ṭha famkimhai chu an hamṭha ie, LALPA dân hrawtuhai chu.

²A thuinhriettirhai zâwmtuhai chu an hamṭha, Lungril po poa zawngtuhai chu.

³Anih, anni chun fel nawna hrim hrim an thaw naw a, A lampuihaia chun an fe hlak.

⁴Nangin i thununna thuhai chu thupêkin i mi pêk a, Ṭhahnemngaitaka kan zâwm theina dingin.

⁵Aw, i thuruothai chu zâwm dingin, Ka um dânhai hi sukdetin um ta ve sien chu aw!

⁶Chu pha chun muolpho naw ning, I thupêkhai po po ka pawisak pha chun.

⁷Lungril indiktak putin lâwmthu hril ka ti che, I rorêlna felhai chu kân chûk thiem pha chun.

⁸I thuruot chu zâwm ka ta, Aw, mi mâksan sawng naw rawh.

⁹Tleirâwlin iengtin am a um dân sukthieng thei a ta? I thu ang peia a um dân chu vêngṭhain,

¹⁰Ka lungril po po hin ka zawng che a, Aw, i thupêkhai ka fehmangsan chu phal lul naw rawh.

¹¹I chunga thil ka suksuol nawna dingin, I thu chu ka lungrilah kân khâwl khâwm a.

¹²Aw LALPA, nang chu inpâk tlâk i nih ie, I thuruothai chu min chûktir rawh.

¹³I baua i rorêl suok po pohai chu, Ka hmûrin kan hriettir tah.

¹⁴I thuinhriettir kawnga chun ka hlim a, Hausakna po poa ka hlim ang elin,

¹⁵I thununna thuhai chu ngaituong ka ta, I lampuihai chu ngaisak bawk ka tih.

¹⁶I thuruothai chunga chun lâwm ka ta, I thu chu theinghil naw ning.

¹⁷Ka hring theina dingin i siehlaw chunga hin ṭhatakin thaw la, Chuongchun, i thu chu zâwm ka tih.

¹⁸I dân thua inthawka thilmak ka hmu theina dingin, Ka mithai hi mi sukvarpêk rawh.

¹⁹Hnuoia hin mikhuol ka na, I thupêkhai chu ka kuoma chun ip naw rawh.

²⁰Ka hringna hi kawi darin a um a, Ienglai khawma i rorêlnahai a ngai leiin.

²¹Mi chapo ṭawngsephurhai chu i kâwk a, I thupêkhai invâkhmangsan hlakhai chu.

²²Hrilsietna le hmusitna hi ka kuoma inthawkin la hmang la, I thuinhriettirhai chu ka zâwm si a.

²³Mi lienhai khawm an ṭhung a, an mi sawisêl a, Nisienlakhawm, i siehlaw hin i thuruothai chu a ngaituo lem a nih.

²⁴I thuinhriettirhai chu ka lâwmna a na, Rem mi ruotpêktu khawm a nih.

²⁵Ka hringna hi pilvutah a kawp tlat a, I thu ang peiin mi sukhar rawh.

²⁶Ka um dânhai chu kân hriettir che a nangin i mi dawn a, I thuruothai chu mîn chûktir rawh.

²⁷I thununna kawng chu mîn hrietthiemtir la, Chuongchun, i thilmak thaw thuhai chu ngaituong ka tih.

²⁸Ka hringna hi lungngai leiin a zawphmang hlak a, I thu ang peiin mi sukhrât rawh,

²⁹Um dân indik naw hi ka kuoma inthawkin la hmang la, I dân chu lunginsiettakin mi pe rawh.

³⁰Umdân ringum ka thlang a, I rorêlnahai ka hmaah kân umtir a.

³¹I thuinhriettirhai chu ka chel tlat a, Aw LALPA, mi sukmuolpho naw rawh.

³²I thupêk lampuia chun tlân ka ta, Ka lungril hi i suklien pha chun.

³³Aw LALPA, i thuruot lampui chu mîn entir la, Chuongchun, a tâwp chenin ka hraw ding annâwm.

³⁴Hrietthiemna mi pe la, chuongchun, i dân chu ka vawng ṭha ding annâwm, Anih, ka lungril po po hin zâwm ka tih.

³⁵I thupêk lampuia chun mîn fetir la, Chutaka chun ka lâwm si a.

³⁶I thuinhriettir tienga chun ka lungril hi inthlêktir la, Duâmna tiengah ni lovin.

³⁷Thil teplo mei mei en lo dingin ka mithai mîn lâkhmangtir la, I lampuihaia chun mi sukhar rawh.

³⁸I thu chu i siehlaw kuoma hin sukdet la, Chu chu nangma ṭinaa mi a nih.

³⁹Mi hrilsietna ka ṭi hi la hmang la, I rorêlhai chu a ṭha si a.

⁴⁰Ngai ta, i thununna thuhai chu hriet kân hâwk hlak a, I felna leiin mi sukhar rawh.

⁴¹Aw LALPA, i ngilneina chu ka kuomah hung raw se, I sandamna ngei chu, i thu ang peiin.

⁴²Chuongchun, a mi hrilsetu dawnna ding nei ka tih, I thu ka ring si a.

⁴³Chun, thutak thu chu ka baua inthawk hin la suok vawng naw la, I rorêlnahai chu ka beisei si hlak a.

⁴⁴Chuongchun, i dân chu zâwm rawp ka tih, Kumkhawtluongin.

⁴⁵Chun, hluotu neilovin lêng ka ta, I thununna thuhai chu ka zawng si a.

⁴⁶I thuinhriettir thuhai chu lalruol hmaah hril ka ta, Inzak naw ningah.

⁴⁷Chun, i thupêk ka ngainat chunga chun, Lâwm ka tih.

⁴⁸I thupêk ka ngainat tienghaia chun ka kuthai phar ka ta, I thuruothai chu ngaituong ka tih.

⁴⁹I siehlaw kuoma thutiem chu hre zing la, Nangin i mîn beiseitir leiin.

⁵⁰Chu chu ka rinumnaa khawm ka thlamuongna a nih, I thu chun a mi sukhar ta si a.

⁵¹Chapohai chun nasatakin an mi nuizat a, Nisienlakhawm, i dân chu ka fe pêtsan nawh.

⁵²Aw LALPA, tiena i rorêlhai chu ka hriet zing a, Kei le kei kân thlamuon hlak.

⁵³Lungninawna nasatak hin a mi tlâk khum a. Mi rilo i dân fesantuhai leiin.

⁵⁴Ka khuol inzinna ina hin, I thuruothai chu ka hla a ni hlak.

⁵⁵Aw LALPA, zâna chun i hming ka hriet zing hlak a, I dân khawm ka zâwm hlak.

⁵⁶Chuong chu ka nei a, I thununna thuhai chu ka vawngṭhat leiin.

⁵⁷LALPA chu ka chanvo a nih, I thu chu zâwm ka tih ti ka hril ta kha.

⁵⁸Ka lungril po poin i lunginsietna ka ngên a, I thu ang peiin mi lunginsiet rawh.

⁵⁹Ka um dânhai ka ngaituo a I thuinhriettir tienga chun ka ke ka pên ta a.

⁶⁰I thupêkhai zâwm dingin, Kân hmaw a sâwt ka riel nawh.

⁶¹Mi rilohai hruihruolhai chun a mi zem hlawm zing a, Nisienlakhawm, i dân chu ka theinghil nawh.

⁶²Zânrila chun lâwmthu hril ding chein tho ka ta, I rorêl felhai lei chun.

⁶³Nangma ṭituhai po po le, I thununna thuhai zâwmtuhai ruol ka nih.

⁶⁴Aw LALPA, leihnuoi hi i ngilneinaa sip a nih, I thuruothai chu mîn chûktir rawh.

⁶⁵Aw LALPA, i thu ang peiin, I siehlaw hi i thaw ṭha hlak.

⁶⁶Ngaituo thiemna le hrietna mîn chûktir la, I thupêkhai chu ka ring si a.

⁶⁷Sukrinuma ka um hma khan kân vâk hmang hlak a, Tu ruok hin chu i thu ka zâwm tah.

⁶⁸Nang chu i ṭha a, thil ṭha i thaw bawk a, I thuruothai chu mîn chûktir rawh.

⁶⁹Chapohai chun ka chungah khêl an phuokfâwm a, Ka lungril po po hin i thununna thuhai chu vawng ṭhâng ka tih.

⁷⁰An lungril chu rîlrâng thau angin a thau a, Kei ruok chu i dân chungah ka lâwm hlak.

⁷¹I thuruothai chu kân chûk thiem theina dinga, Sukrinuma ka lo um kha ka ta dingin a ṭha a nih.

⁷²Rângkachak le tangka sâng tamtak nêk chun, I baua dân suok chu ka ta dingin a ṭha lem.

⁷³I kutin i mi siemin, i mîn din a nih, I thupêkhai chu kân chûk thiem theina dingin hrietthiemna mi pe rawh.

⁷⁴Nangma ṭituhai chun mi hmûng an ta, lâwm an tih, I thu chu ka beisei hlak leiin.

⁷⁵Aw LALPA, i rorêlhai chu a fel ti le, Nang chun ringumtakin a nih i mi sukrinum chu ti ka hriet.

⁷⁶I siehlaw kuoma i thutiem ang peiin, Lunginsiettakin i ngilneina chu ka thlamuongna ding ni raw se.

⁷⁷Ka hring theina dingin i lainatnahai chu ka kuomah hung raw se, I dân chu ka lâwmna a ni si a.

⁷⁸Chapohai chu muolphoin um raw se, indik nawtakin an mi suktlâwm ta si a, Nisienlakhawm, i thununna thuhai chu ngaituong ka tih.

⁷⁹Nangma ṭituhai chu keia tieng hung ngha hai sienla, Chuongchun, i thuinhriettirhai chu an hriet ding annâwm.

⁸⁰Ka muolpho nawna dingin, Ka lungril hi i thuruothaia chun ṭha famkimin um raw se.

⁸¹Ka hringna hi i sandamna ngaiin a chau ta a, Nisienlakhawm, i thu ka beisei hlak.

⁸²I thu thlîrnân ka mit ân vai zo ta a, “Nangin iengtik am mi thlamuon i ta?” ka ti ka ti hlak.

⁸³Meikhu thlûta savun peng ang chu ka hung ni ta a, Nisienlakhawm, i thuruothai chu ka theinghil nawh.

⁸⁴I siehlaw kum chin ding hi iengzât am nîng a ta? A mi suknawmnatuhai chunga hin iengtik am ro i rêl ding a na?

⁸⁵Mi chapo, i dân anga um nawhai chun, Ka tlâkna dingin khurhai an cho a.

⁸⁶I thupêk po po chu ring a um a nih, Anni chun indik nawtakin an mi suknawmna hlak hi, mi ṭhangpui rawh.

⁸⁷Anni chun hnuoia hin an mi sukbohmang vâng vâng a, Nisienlakhawm, i thununna thuhai chu ka nghatsan si naw a.

⁸⁸I ngilneina ang peiin mi sukhar la, Chuongchun, i baua thuinhriettir chu ka zâwm ding annâwm.

⁸⁹Aw LALPA, kumkhawtluonga dingin, I thu chu vânah dettakin a um a;

⁹⁰I ringumna chu suon po po chenin um a ta, Leihnuoi hi i sukdet a, a um zing a nih.

⁹¹Chuonghai chu vawisûn hin i rorêlhai angin an um zing a, Thil po po chu i siehlawhai an ni si a.

⁹²I dân chu ka lâwmna ni naw sienla chu, Ka rinumnaa khan ka bohmang ta ding a nih.

⁹³I thununna thuhai chu iengtika khawm theinghil naw ning, Nangin chuong chun mi i sukhar ta si a.

⁹⁴I ta ka ni hi, mi sandam rawh, I thununna thuhai chu ka zawng si a.

⁹⁵Mi rilohai chun mi sukbohmang tumin an mi nghâk si a, Nisienlakhawm, i thuinhriettirhai chu ngaituong ka tih.

⁹⁶Ṭhat famkimna po po tâwpna chu ka hmu ta a, I thupêk ruok chu a lien khawp el a nih.

⁹⁷Aw, i dân hi ka va ngaina de aw! Sûnnithlâka ka ngaituo hlak chu a nih.

⁹⁸I thupêkhai chun a mi dotuhai nêka var lemin a mi siem a, Kumkhawtluonga ka kuoma a um zing hlak leiin.

⁹⁹A mîn chûktirtuhai po po nêkin varna ka nei lem a nih, I thuinhriettirhai hi ka ngaituo a ni hlak leiin.

¹⁰⁰Tarhai nêk chun ka hriet thiem lem a nih, I thununna thuhai hi ka vawng ṭhat leiin.

¹⁰¹I thu ka zâwm theina dingin, Lampui suola hrim hrim chun ka kehai hi pên ka phal nawh.

¹⁰²I rorêlnaa inthawk chun ka pêt hmang naw a, Nangin i mîn chûktir leiin.

¹⁰³I thuhai hi ka bau ta dingin a va thlum de; Anih, ka bau ta ding chun khuoizu nêkin a thlum lem.

¹⁰⁴I thununna thuhai leiin hrietthiemna ka nei hlak, Chuleiin, um dân indik naw tinrêng hi ka theida a nih.

¹⁰⁵I thu hi ka kehai ta dingin khâwnvar a na, Ka lampuia dingin var a nih.

¹⁰⁶I rorêlna feltakhai chu zâwm dingin, Ṭawng kân khâm a, ka sukdet bawk a.

¹⁰⁷Nasataka sukrinumin ka um a, Aw LALPA, i thu ang peiin mi sukhar rawh.

¹⁰⁸Aw LALPA, lunginsiettakin, ka baua nuomthua thilpêkhai hi la la, I rorêlnahai chu mîn chûktir rawh.

¹⁰⁹Ka hringna hi ka kutah a um rawp hlak a, Nisienlakhawm, i dân chu ka theinghil ngai naw a.

¹¹⁰Mi rilohai chun ka âwkna dingin châng an kam a, Nisienlakhawm, i thununna thuhai chu kân vâk hmangsan nawh.

¹¹¹I thuinhriettirhai chu kumkhawtluonga ka ro dingin ka lâk a, Ka lungril suklâwmtu a ni si a.

¹¹²Kumkhawtluongin, a tâwp chenin, I thuruothai anga thaw dingin ka lungril kân thlêktir a.

¹¹³Lungril mumal neilo mihai chu ka theida a, I dân ruok chu ka ngaina a nih.

¹¹⁴Nang chu kân bîkhmangna le ka phaw i na, I thu ka beisei a nih.

¹¹⁵Nangni thil ṭha naw thawtuhai, mi mâksan ro, Ka Pathien thilpêkhai ka vawng ṭhat theina dingin.

¹¹⁶Ka hring theina dingin i thu ang peiin mi chel zing la, Ka beisei chunga hin inzakin mîn umtir naw rawh.

¹¹⁷Mi kei la, chuongchun, him ka ta, I thuruothai chu ka pawisa rawp ding a nih.

¹¹⁸I thuruothai invâkhmangsantuhai po po chu i hmusit a, An hlêmna chu khêl a ni si a.

¹¹⁹Hnuoia mi rilohai po po chu thilêksie angin i sukbohmang hlak a, Chuleiin, i thuinhriettirhai chu ka ngaina a nih.

¹²⁰Ka tisa hi nangma ṭîin ân thin a, I rorêlnahai chu ka ṭî bawk a.

¹²¹Ro ka rêl a, feltakin ka thaw hlak a nih, A mi nêksâwrtuhaia inthawkin mi thlathlam naw rawh.

¹²²I siehlaw chungchâng thuah, a ṭhatna dingin a bul tum la, Chapohaiin mi nêksâwr naw raw se.

¹²³I sandamna thlîrnân ka mit ân vai zo ta a, I thu feltak thlîrna leh.

¹²⁴I ngilneina ang peiin i siehlaw chunga hin thaw la, I thuruothai chu mîn chûktir rawh.

¹²⁵I siehlaw ka na, hrietthiemna mi pe la, I thuinhriettirhai chu ka hriet theina dingin.

¹²⁶LALPA, sinthaw a hun tah, I dân hi ieng ni lovin an siem ta si a.

¹²⁷Chuleiin, i thupêkhai chu rângkachak nêkin ka ngaina a nih, Anih, rângkachak inthieng nêk khawma.

¹²⁸Chuleiin, kawng tinrêng thuah, i thununna thuhai po po chu indikin ka hriet a, Um dân indik naw tinrêng hi ka theida a nih.

¹²⁹I thuinhrietirhai chu a mak a nih, Chuleiin, ka hringna hin a vawng ṭha hlak.

¹³⁰I thu hrilfie hin mihai a sukvar a, Mi mâwlhai chu ân hrietthiemtir hlak.

¹³¹Ka bau ka ka lien a, kân thuok hlawp hlawp a, I thupêkhai chu ka châk leiin.

¹³²Keia tieng hung ngha la, mi lunginsiet rawh, I hming ngainatuhai i lunginsiet ang khan.

¹³³Ka ke pênhai hi i thuah sukdet la, Suolna hrim hrim ka chungah thu inneitir naw rawh.

¹³⁴Mihriem nêksâwrnaa inthawk chun mi sanhim la, Chuongchun, i thununna thuhai chu ka zâwm ding annâwm.

¹³⁵I hmêlin i siehlaw sunvar la, I thuruothai chu mîn chûktir rawh.

¹³⁶Ka mitthli hi vadung tui angin a luong thla a, I dân an zâwm naw leiin.

¹³⁷Aw LALPA, nang chu i fel a, I rorêlhai khawm ân dik a nih.

¹³⁸I thuinhriettirhai chu feltak le, Ringum êm êmin thu i pêk a.

¹³⁹Ka ṭhahnemngaina hin a mi sukbohmang ta a, A mi dotuhaiin i thu an theinghil leiin.

¹⁴⁰I thu hi ân thieng êm êm a nih, Chuleiin, i siehlaw hin a ngaina a nih.

¹⁴¹Mi chîn mi hmusit ka na, Nisienlakhawm, i thununna thuhai chu ka theinghil ngai nawh.

¹⁴²I felna chu kumkhawtluong felna ding a na, I dân khawm thutak a nih.

¹⁴³lunginzîngna le thlaphângna chun a mi tlâk khum ta a, Nisienlakhawm, i thupêkhai hi ka lâwmna a nih.

¹⁴⁴I thuinhriettirhai chu kumkhuoa dingin a fel a nih, Hrietthiemna mi pe la; chuongchun, hring zing ka tih.

¹⁴⁵Ka lungril po poin ka ko che a, Aw LALPA, mi dawn rawh; I thuruothai chu ka vawng ṭha ding annâwm.

¹⁴⁶Ka ko hlak che a, mi sandam rawh; Chuongchun, i thuinhriettirhai chu ka zâwm ding annâwm.

¹⁴⁷Varṭien chu ka khal a, ka khêk hlak a, I thuhai chu ka beisei hlak.

¹⁴⁸I thu ka ngaituo theina dingin, Ka mitin zân vêng hunbihai chu a meng khal hlak.

¹⁴⁹I zainêmna ang peiin ka râwl hi ngai la, Aw LALPA, i rorêlnahai ang peiin mi sukhar rawh.

¹⁵⁰Ngaituona suol hnawttuhai chun an hung hnai a, Anni chu i dân hlata um an nih.

¹⁵¹Aw LALPA, nang chu i hnai a, I thupêk po po chu thutak a nih.

¹⁵²Tienlaiin, i thuinhriettirhaia inthawkin, Chuong chu kumkhawtluonga dingin i sukdet ti ka lo hriet tah.

¹⁵³Ka rimsikzie hi ngaituo la, mi sanhim rawh, I dân chu ka theinghil ngai si naw a.

¹⁵⁴Ka thu mi hrilpuiin mîn tlan la, I thu ang peiin mi sukhar rawh.

¹⁵⁵Sandamna chu mi rilohaia inthawk chun a hla a nih, I thuruothai chu an zawng naw leiin.

¹⁵⁶Aw LALPA, i lainatnahai chu a nasa a nih, I rorêlnahai ang peiin mi sukhar rawh.

¹⁵⁷A mi suknawmnatu le a mi dotuhai chu tamtak an nih. Nisienlakhawm, i thu inhriettirhai chu ka pêt san nawh.

¹⁵⁸Vervêktaka thawtuhai chu, ka en a, ka lungni naw a, I thu an zâwm naw leiin.

¹⁵⁹I thununna thuhai ka ngainatzie hi ngaituo la, Aw LALPA, i ngilneina ang peiin mi sukhar rawh.

¹⁶⁰I thu inpawl khâwm chu thutak a nih, I rorêlna fel tinrêng khawm hi kumkhawtluongin um zing a tih.

¹⁶¹Mi lienhaiin a san um lovin an mi suknawmna a, Nisienlakhawm, ka lungril chun i thuhai a nih a ṭî chu.

¹⁶²I thua hin ka hlim a nih, Thil ropuitak râllâka hmutu angin.

¹⁶³Khêl hi ka theidain ka tirdak a, I dân ruok chu ka ngaina a nih.

¹⁶⁴Ni khatah vawi sari kân pâk hlak che a nih, I rorêl felhai leiin.

¹⁶⁵I dân ngainatuhai chun thlamuongna nasatak an nei a, Tlûkna hrim hrim an nei nawh.

¹⁶⁶Aw LALPA, i sandamna ka beisei zing a, I thupêkhai angin ka thaw hlak.

¹⁶⁷Ka hringna hin i thuinhriettirhai chu a zâwm hlak a, Ka ngaina êm êm a nih.

¹⁶⁸I thununna thuhai le i thuinhriettirhai chu ka zâwm hlak a, Ka um dân po po khawm hi i hmaa um a ni si a.

¹⁶⁹Aw LALPA, ka khêkri hi i hmaah hung hnai raw se, I thu ang peiin hrietthiemna mi pe rawh.

¹⁷⁰Lunginsiet ka hnina hi i hmaah tlung raw se: I thu ang peiin mi sanhim rawh.

¹⁷¹Ka hmûr hin inpâkna thu hril raw se, Nangin i thuruot thuhai chu i mîn chûktir hlak leiin.

¹⁷²Ka lei hi,i thu inpâkin hla sak raw se, I thupêk po po chu felna a ni leiin.

¹⁷³I kut chu mi ṭhangpui dinga inzosain um raw se, I thununna thuhai chu ka thlang si a.

¹⁷⁴Aw LALPA, i sandamna chu ka châk hlak a, I dân chu ka lâwmna a nih.

¹⁷⁵Ka hringna hi hring raw se; chuongchun, ân pâk ding che annâwm, I rorêlnahai khawmin mi ṭhangpui raw se.

¹⁷⁶Berâm inhmang angin kân vâkhmang a, i siehlaw hi zawng rawh. I thupêkhai chu ka theinghil ngai si nawh.