Read Hmar INPÂKNA HLA BU 138 Bible Online

INPÂKNA HLA BU 138 - Hmar bible

INPÂKNA HLA BU 138

¹David Inpâkna Hla. I kuomah ka lungril po poin lâwmthu hril ka ta, Pathienhai hmaa chun nangma inpâkin hla sak ka tih.

²I biekin inthieng tieng nghain chibai bûk ka ti che a, I ngilneina le i thutak leiin i hming inpâk ka tih. I thu chu i hming hrim hrim nêk chun i chawisâng ta si a.

³Ka ko ni che khan nangin i mi dawn a, Ka hringna sukhrâtin i mîn fui a,

⁴Aw LALPA, hnuoia lal po po chun lâwmthu hril an ti che, I baua thu suokhai chu an hriet si a.

⁵Anih, LALPA um dân thuhai chu hlaah sak an ta, LALPA ropuizie chu a nasa si a.

⁶LALPA chu chunghnungtak a nia chu a mi inhnuoihai a ngaisak hlak. Mi chapohai ruok chu hlataka inthawkin a hriet hlak.

⁷Lunginzîngna laia chun lêng lang khawm nangin mi sukhar i ta, A mi dotuhai lunginsen thaw dingin nangin i kut phar i ta: I kut changtiengin mi sandam i tih,

⁸LALPA chun ka chungchânga a thaw ding chu hlen a tih, Aw LALPA, i ngilneina chu kumkhawtluongin um a ta, Nangma kut thilthawhai hi bânsan naw rawh.