Read Hmar INPÂKNA HLA BU 144 Bible Online

INPÂKNA HLA BU 144 - Hmar bible

INPÂKNA HLA BU 144

¹David Inpâkna Hla. LALPA ka lungpui chu inpâkin um raw se; Ama chun ka kuthai hi râlkâp ân chûktir hlak a; Ka kutpârhai hi indo dân ân chûktir bawk a.

²Ka ngilneina le ka kulpui, Ka kulbîng insâng le a mi sandamtu, Ka phaw le ka ringna innghatna; Ka hnuoia ka mihai tukdawl hlaktu chu a nih.

³ LALPA, mihriem hi ieng am a na i hriet hlak a na? Mihriem naupa khawm hi ieng am a na i ngaituo hlak a na?

⁴Mihriem hi iengkhawm ni lo ang a na, A dam sûng nihai chu hlim inhmang hlak ang hi a nih.

⁵Aw LALPA, i vânhai sukkûnin hung ṭum la, Tlânghai chu tâwk la; chuongchun, khu suok an tih.

⁶Kâwl inleptir la, annirawi chu sukdar la, I thalhai chu kâp suok la, sukbuoi hrep rawh.

⁷Chungtienga inthawkin i kut hung ban la, Mi sansuok la, tui liena inthawkhai hin mi sanhim rawh, Mikhuolhai kuta inthawk hi.

⁸An bau chun thu teplo mei mei an hril hlak a; Vânni khâmnaa chen khawm khêl an la hril ta rawp a.

⁹Aw Pathien, nangma chawimawiin hla thar sak ka tih; Perkhuong hrui sâwm nei mi leh nangma inpâkin hla sak ka tih.

¹⁰Ama chu a nih, lalhai kuoma sandamna pe a, Kâwlhnâm mi sukkhawlotheia inthawka a siehlaw David sansuoktu chu.

¹¹Mi sansuok la, mikhuolhai kuta inthawkin mi sanhim rawh, An bau chun thu teplo mei mei an hril hlak; An kut changtieng chu kut changtieng indik naw a nih.

¹²Ei naupasalhai an tleirâwl a, thing inno anga an um a, Ei naunuhmeihai khawm lal in um dâna a kia lung sut anga an um pha:

¹³Ei bu inhai a hung sip a, thil tinrêng a um rei rui a, Ei berâmhai khawma tê a sânga sâng tamtak, a sînga sîng tamtak ei phûlhaia an nei phâleh;

¹⁴Ei bâwng ruolhaiin tê pâia nei ṭeuin, Te insietna le hlawsamna hrim a um naw phâleh, Ei kawtthlêrhaia beidawng khêk râwl hrim hrim a um dêr naw pha chun:

¹⁵Chuong anga um mihai chu lâwmtakin an um hlak a: Anih, LALPA Pathiena nei mihai chu lâwmtakin an um hlak.