Read Hmar INPÂKNA HLA BU 16 Bible Online

INPÂKNA HLA BU 16 - Hmar bible

INPÂKNA HLA BU 16

¹David Miktam Aw Pathien, mi humhim rawh, nangmaa chun ka ringna kân nghat si hlak a.

²LALPA kuoma chun, “Nang chu ka LALPA i na, Nangmaa naw chun thil ṭha hrim ka nei nawh,” ka ti a.

³Hnuoia mi inthieng umhai thua chu, Anni chu mi ṭha, ka lâwmna po po umnahai chu an nih.

⁴Pathien dang thlangtuhai chu an lungngaina sukpungin la um a ta, An dâwn chi thisen inhlânhai chu inhlân ve nâwng ka ta, Ka hmûr khawma an hminghai lam bawk naw ning.

⁵LALPA chu ka rochan ding le ka no chan ding chu a na, Nangin ka chanpuol i mi sukdetpêk hlak.

⁶Inkhina hruihai chu hmun inhawitakhaiah ka puolin a tla ta hlau a nih, Anih, ro ṭhatak ka hluo tah a nih.

⁷LALPA, rem mi ruotpêktu chu inpâk ka ta, Anih, zânahai chun ka lungrilin a mi thunun hlak.

⁸ LALPA chu ka hmaah kân umtir rawp hlak a, Ka changtieng a um leiin inhnîng naw ning.

⁹Chuleiin, ka lungril hi a lâwm a, ka ropuina[1] khawm a hlim a; Ka taksa khawm himtakin um a tih.

¹⁰Ka thlarau chu Seol kuomah i mâksan âwm si naw a, I mi inthieng hi hmawnna hmu i phal âwm bawk si naw a.

¹¹Nangin hringna lampui chu min hriettir i ta, I hmaa chun hlima sipliemna a um a; I kut changtienga chun kumkhaw lâwmna ding a um.