Read Hmar INPÂKNA HLA BU 17 Bible Online

INPÂKNA HLA BU 17 - Hmar bible

INPÂKNA HLA BU 17

¹David ṭawngṭâina Aw LALPA, ka felna thu hi hre la, ka khêk ri hi ngâi bawk la, Ka ṭawngṭâina, khêl hril hmang hmûra inthawka suok ni lova hin na lo sit la.

²Ka chungthua thu tlûkna chu i hmaa inthawka suok ni sienla, I mit chun thlierbîk nei nawna en raw se.

³Ka lungril hi i fie a, zânah nangin i mi hung sir a; I mi fie ta a, iengkhawm i hmu si naw a; Ka baua hril suol lo chu ka tum tlat a nih.

⁴Mihriem thilthawa chun chu, i hmûra thu suok leiin, Mi nunrâwng lampui chu hraw lo dingin kân vawng ṭha a nih.

⁵Ka ke kalchawihai hin i lampui chu a hraw tlat a, Ka kehai hi ân tleu ngai si nawh.

⁶Aw Pathien, ka ko hlak che a, nangin i mi dawn âwm si a, Keia tieng hin i na hung sit la, ka thu hril hi ngai rawh.

⁷Aw nangmaa ringna innghattu taphawt anni thawtuhaia inthawka i kut changtienga sandam hlaktu. I ngilneizie maktak chu inlangtir rawh.

⁸Mit nautê angin mi kawl ṭha la, I thla hnuoiahai chun mi thup rawh,

⁹Mi rilo mi suksetu, Thipui thei ka hmêlmahai, a min huol vêl tlattuhaia inthawk hin.

¹⁰Anni chu anni thâu vêka inhuonin an um a, An bauin chapotakin an ṭawng hlak.

¹¹Tuhin chu kan kalchawina taphawtah an mîn huol vêl ta a, Hnuoia mi sukthlu dingin an mithai chu kan chungah an infûktir zing a.

¹²Ama chu sakeibaknei sa se inhâwktak ang le, Sakeibaknei vânglai, hmun fienrielhaia bawk zing ang chu a nih.

¹³Aw LALPA, tho la, ama chu hmasawn la, inkûntir tlat rawh, Ka hringna hi mi rilohaia inthawk chun i kâwlhnâmin sanhim la,

¹⁴Aw LALPA, i kutin mihriemhaia inthawkin, Khawvêl mihriemhaia inthawk hin sanhim la, Anni chanvo chu hi dam sûnga an nei hi a na, An phîng chu i roin i suksippêk hlak a; Nauhai lungawi tâwk zetin an nei a, An sum hmang mahla chu an nautesenhai an thisanpêk hlak.

¹⁵Kei ruok chun felna neiin i hmêl hmûng ka ta, Nanga angna neia ka meng pha chun lungawi tâwk zet tâng ka tih.