Read Hmar INPÂKNA HLA BU 27 Bible Online

INPÂKNA HLA BU 27 - Hmar bible

INPÂKNA HLA BU 27

¹David Inpâkna Hla LALPA chu ka var le ka sandamna a nih, tu am ṭîng ka ta? LALPA chu ka hringna kulbîng a nih; tu am ṭîng ka ta ?

²Thil ṭha naw thawhai, mi dotuhai le ka hmêlmahai chun, ka sa fâk tuma an mi thaw lai khan, An insui a, an tlu tâwl ta a.

³Sipai pâwlhai chun mi thaw tumin mi ep zing hai sienla khawm, Ka lungril hin ṭi naw ni; Ka chungah indona hung suok sienla khawm, Chuong ang a khawm chun ring tlat ka tih.

⁴LALPA kuomah thil pakhat ka hni a chu mawl chu zawng ka tih, LALPA mawizie hmu ding le a biekina thu indawn dingin, Ka dam sûng poa LALPA ina ka um zing theina ding chu.

⁵Lunginzîng ni chun a bûktêah a mi sie hmang âwm si a, A humhimna puon ina chun mi thuphmang a tih; Lungpui chungah mi dawm kai a tih.

⁶Tuhin chu a mi dotu, a mîn huolvêltuhai chungtieng ka lu hi dawm kângin um a tih, Chuongchun, a puon ina chun hlimna inthâwinahai inhlân ka tih; Hla sak ka ta, anih, LALPA inpâkin hla sak ka tih.

⁷Aw LALPA, ka râwla ka ko che chun lo ngai la, Mi lunginsiet la, mi dawn bawk rawh.

⁸“Ka hmêl zawng ro,” ti a i hril lai khan, ka lungril chun i kuomah, “LALPA, i hmêl zawng ka tih,” a ti a.

⁹Ka kuoma inthawk hin i hmai thup naw la, I siehlaw hi i lunginsenin sukbohmang naw la, Nang chu a mi ṭhangpuitu i ni hlak a, Aw a mi sandamtu Pathien, mi pei thla naw la, mi mâksan lul naw rawh.

¹⁰Ka nu le pa chun an mi mâksan ta si a, Nisienlakhawm, LALPA chun mi la pawm a tih.

¹¹Aw LALPA, i lampui chu mîn entir la, Ka hmêlmahai lei hin, Lampui inpheitakah mi ṭhuoi rawh.

¹²A mi dotuhaiin nuom nuoma an mi thaw dingin mi pe lul naw la, Hretu tehlêm chun an mi thaw a, nunsiet thu sâksuok hlaktuhai chun.

¹³Mi hring rama hin, LALPA ṭhatna hmu inring naw lang chu ka chau ta ding a nih.

¹⁴LALPA chu nghâk zing rawh, Hrâttakin um la, i lungril chu insukhuoi raw se; Anih, LALPA chu nghâk zing rawh.