Read Hmar INPÂKNA HLA BU 28 Bible Online

INPÂKNA HLA BU 28 - Hmar bible

INPÂKNA HLA BU 28

¹David Inpâkna Hla Aw LALPA, ka ko ding che a ni hi, Ka lungpui, keimaa inthawk hin i na chu suksêt naw la; Chuong naw chun, nangin i mi tosan chun, Khur sûnga zu fehai ang elin hung um rawi ka tih.

²Ka ko che a, ka kuthai hi i biekna hmun inthieng tieng ka phar chun, Lunginsiet ka hnina râwlhai hi lo ngai rawh.

³Mi rilohai le thil suksuolhai laia chun, Mi hnûkhmang sa naw rawh. Chuonghai chun an vênghai kuomah inremnna thu an hril hlak a, Nisienlakhawm, an lungrilhaia chun thil suksuolna a um zing si a.

⁴An thilthaw ang pei le, an thilthawhai a suolzie ang peiin thung la, An kuta an sinthaw ang peiin thung la; An suol man chu inhmutir rawh.

⁵ LALPA sinthawhai le, A kuta a thilthaw chu an ngaisak naw leiin, Ama chun anni chu siemṭha lovin suksieng a tih.

⁶Lunginsiet ka hnîna râwlhai hi a ngai hlak leiin, LALPA chu inpâkin um raw se.

⁷LALPA chu ka hrâtna le ka phaw a na, Ka lungril hin ama chu a ring a; chuongchun, sanin ka um a, Chuleiin, ka lungril hi nasatakin a hlim a, Ka hla chun ama inpâk ka tih.

⁸LALPA chu an hrâtna a na, A hrieknâl ta ding chun sandamna kulbîng a nih.

⁹I mihai chu sandam la, i rochan chu malsâwm rawh: Anni chu châwm la, kumkhuoin pawm rawh.