Read Hmar INPÂKNA HLA BU 29 Bible Online

INPÂKNA HLA BU 29 - Hmar bible

INPÂKNA HLA BU 29

¹David Inpâkna Hla Aw mi thilthawtheitak nauhai, LALPA kuomah pe unla, LALPA kuoma chun ropuina le hrâtna pe ro.

²LALPA kuomah a hming ropuina chu pe unla, Inthieng mawina inbelin LALPA chu chibai bûk ro,

³LALPA râwl chu tuihai chunga chun ân ri a Ropuina Pathien chu a hung inri dur dur a, LALPA ngei chu tui tamtak chunghaia chun a hung inri a.

⁴LALPA râwl chu thilthawtheitak a na, LALPA râwl chu ropuitak a nih.

⁵LALPA râwl chun Sidar thinghai chu sukthliek a ta, Anih, LALPA chun Lebanon tlânga sidar thinghai chu a sukthliek seng sung hlak.

⁶Bâwngte tuoltla angin ân changtir hlak a, Lebanon chu bâwngte tuoltla angin ân châwmtir hlak a, Sirion tlânghai chu ramsiel tê ang elin.

⁷LALPA râwl chun meichawkhai chu a thlêr hlak a.

⁸LALPA râwl chun thlalêr a tlawr hnîng a; LALPA chun Kades thlalêr chu a sukhnîng hlak.

⁹LALPA râwl chun sazukpui chu tê ân siettir a, Rampui thinghnahai chu a nuoi kawl vawng hlak a: A biekina chun thil iengkimin, “A ropui ie,” an ti seng hlak.

¹⁰LALPA chu Tuilêt lai khan lalah a ṭhung a, Anih, LALPA chu kumkhuoa dingin lalah a ṭhung a nih.

¹¹LALPA chun a mihai kuomah hrâtna pêng a ta, LALPA chun a mihai chu thlamuongnain malsâwm a tih.