Read Hmar INPÂKNA HLA BU 33 Bible Online

INPÂKNA HLA BU 33 - Hmar bible

INPÂKNA HLA BU 33

¹Aw mi felhai, LALPAA chun hlimin hla sak ro, Mi indik ta ding chun Pathien inpâk hi a âwm hrim a nih.

²Ṭingṭangin LALPA kuoma chun lâwmthu hril unla, Perkhuong hrui sâwm nei mi leh ama inpâkin hla sak ro.

³Ama chawimawiin hla thar sak unla, Ri nasatak leh thiemtakin sut ro.

⁴LALPA thu chu ân dik a, A thilthaw po po chu ringumtaka thaw a ni si hlak a.

⁵Felna le rorêlna fel hi a ngaina hlak a; Leihnuoi hi LALPA ngilneinain a sip a.

⁶LALPA thuin vânhai chu siem a na, Chuonga umhai po po khawm chu a baua thuok chun siem an ni bawk a.

⁷Ama chun tuisuoriet tuihai chu iengkhat siekhâwm thûr angin a sukkhâwm a, Tui inthûktakhai chu siekhâwmna inahai a sieṭha hlak.

⁸Leihnuoi hluo po pohai chun LALPA chu ṭî hai sienla, Khawvêla um po pohai chu ama ṭiin um raw se.

⁹Ama chun a hril a, a hung um ta a, Thu a pêk a, a hung det ta si a.

¹⁰LALPAIN hnam tin remruot chu iengkhawm ni lovah ân changtir a, Mi tin ngaituohai chu iengkhawm ṭhathnemna nei lovin a siem hlak.

¹¹LALPA remruot ruok chu kumkhuoin um det a ta, A lungrila a ngaituohai chu suon po po chenin umdet a tih.

¹²LALPA Pathiena nei hnam chu an hamṭha a, Ama rochan dinga a thlang mihai chu.

¹³LALPA chun vâna inthawk khin a thlîr a, Mihriem nauhai po po hi a hmu hlak.

¹⁴Hnuoia um po po hi, A umna hmuna inthawk khin a hung thlîr hlak,

¹⁵An rênga lungril siem hlak a, An thilthaw po po ngaituo hlaktu chun.

¹⁶Lal hrim hrim hi sipaihai tam lei ngawta sandama um an um ngai nawh: Mi hrât hi hrât bêk bêk lei ngawta sanhim an ni ngai nawh.

¹⁷Sakawr hi insanhimna dingin iengkhawm a ni naw a, A hrât bêk bêk leiin tukhawm sanhim bawk naw nih.

¹⁸Ngai ta, LALPA mit chu ama ṭîtuhai chunga chun a fu zing hlak a, A ngilneina beiseituhai chunga chun.

¹⁹An hringna thinaa inthawka sanhim ding le, Ṭâm tlâk phaa anni tungnung dingin.

²⁰Ei hringna hin LALPA a nghâk zing a, Ama chu mi ṭhangpuitu le ei phaw a nih.

²¹Amaa chun ei lungril hi a hlim ding a nih, A hming inthieng ei ring leiin.

²²Aw LALPA, i ngilneina chu kan chungah um raw se. Kan beisei ang pei chein.