Read Hmar INPÂKNA HLA BU 34 Bible Online

INPÂKNA HLA BU 34 - Hmar bible

INPÂKNA HLA BU 34

¹David Inpâkna Hla. Abimelek hmaa a um dân ân sukdanglam a, amain a lo hnawtdawk laia mi. Ienglai khawmin LALPA chu inpâk ka ta, Ama inpâkna chu ka bauah suok rawp a tih.

²Ka hringna hin LALPA chu suong a ta, Mi rimsihai[6] chun chu chu hrieng an ta, lâwm an tih.

³Aw LALPA chu mîn pâkpui unla, A hming chu chawimawi seng ei tiu.

⁴LALPA chu ka zawng a, chun, ama chun a mi dawn a. Ka iṭi po poa inthawk chun a mi sanhim tah.

⁵Ama an en a, chun, an hung var suok ta a, An hmêlhai chu iengtika khawm inzak naw ni.

⁶Hi mi rimsi hi a khêk a, LALPA chun a lo hriet a, A lunginzîngna po poa chun a sansuok ta a.

⁷Ama ṭîtuhai chu an vêla chun LALPA vântirko chun a um ngha a. A sanhim hlak.

⁸Aw LALPA ṭhatzie chu intem sin hrim ta u: Amaa ringna innghattu chu a hamṭha.

⁹Aw, a mi inthienghai, LALPA chu ṭi unla, Ama ṭîtuhai ta ding chun tlâksamna hrim hrim a um si nawh.

¹⁰Sakeibaknei vânglaihai chu an tlasamin an phîng a ṭâm hlak a: LALPA zawngtuhai ruok chun thil ṭha hrim hrim tlasam naw ni hai.

¹¹Hung ro, naupanghai ka thu ngai ta u, LALPA ṭi dân lo inchûktir ka ti cheu.

¹²Thilṭha a hmu theina dinga hringna dita, Dam sâwt ngaina mi chu tu am a na?

¹³I lei chu suola inthawkin vêngṭha la, I hmûr chu hlêmna thu hril lo dingin.

¹⁴Suol chu fe san la, thil ṭha thaw rawh; Inremna zawng la, a hnawtin hnawt rawh.

¹⁵LALPA mit chun mi felhai tieng a en hlak a, Ama chun an khêk hre dingin a ngai zing hlak.

¹⁶LALPA hmêl chun thil suksuoltuhai chu a do hlak a, Anni hriet zingna chu hnuoia inthawka sukbohmang dingin.

¹⁷Mi felhai chu an khêk a; LALPA chun a lo hriet a, An lunginzîngna po poa chun a sansuok ta a.

¹⁸LALPA chun lungrila lungriem ithlâkhai chu a hnai hlak a, Lungrila insîrhai po chu a sandam hlak.

¹⁹Mi fel rinumnahai chu a tam a, Nisienlakhawm, chuong po poa chun LALPAIN a sansuok hlak.

²⁰A ru po po a vawng ṭha a, Pakhat khawm sukthliek a ni nawh.

²¹Thil ṭha nawin mi rilohai chu sukhlum a ta, Mi fel theidatuhai chun thiemnaw chang an tih.

²²LALPA chun a siehlawhai hringna chu ân tlan hlak a, Amaa ringna innghattuhai chu pakhat khawm thiemnaw chang um naw ni hai.