Read Hmar INPÂKNA HLA BU 35 Bible Online

INPÂKNA HLA BU 35 - Hmar bible

INPÂKNA HLA BU 35

¹David Inpâkna Hla Aw LALPA, a mi thawtuhai chu nangin thaw la, A mi dotuhai chu nangin do rawh.

²Phaw chîn le phaw lien chel la, Mi ṭhangpui dingin ngîr rawh.

³Fei le hreipui chu inlet la, A mi hnawttuhai lampui chu lo dang la, Ka hringna kuoma hin, “I sandamna ka nih,” ti rawh.

⁴Ka hringna sukbo tuma zawngtuhai chu, sukmuolphoa sukzakin umhai sienla, Mi suksietna ding ngaituotuhai chu intlânsiettirin thuokdawngtakin um raw se.

⁵LALPA vântirkoin khal peiin, Busî thli ilên angin um raw se.

⁶LALPA vântirkoin hnawt pei sien, An lampui chu inthimtak le innâltak ni raw se.

⁷A san um lovin, an mi âwkna dingin an lên chu khura chun an pha rûk a, A san um lovin ka hringna tlâkna dingin khur an cho si a.

⁸Ân ringnaw kârin sietna a chungah tlung sienla; A lên pha rûka khan ama ngei âwk bawk sienla: Chutaka chun tla se dêr raw se.

⁹Chuongchun, ka hringna hi LALPAA chun hlim a ta; A sandamnaa chun lâwm a tih.

¹⁰Ka ru po po hin, “ LALPA, mi rimsi, a khing zo ruollova inthawka sanhimtu, Anih, rimsi le pasie, ama inram hlaktua inthawka sanhimtu, Nang ang hrim tu am um?” tîng a tih.

¹¹Hretu fel nawtakhai an hung tho a, Ka thil hriet dêr naw thua dâm an mi suosal a.

¹²Ka hringna khawm beidawng dêr khawpin, Thil ṭha thil suolin an mi thung a.

¹³Kei ruok chu, an damnaw lai chun ka silfên chu saiip a na, Ka hringna hi bu ngheiin ka suk rimsi si a; Lungse taka kûnin ka ṭawngṭai a,[7]

¹⁴Ka ruol amanih, ka unau amani chunga chun ka um dân ding ang takin ka um a;[8] Kân lawn vêl chu khuo khawm ngha ngam lova ngûiin. Mi a nu ṭâtu angin sûnin ka kûn a.

¹⁵Nisienlakhawm, ka chan a sein anni chu an lâwm a, an inhâwr khâwm hiel a, Mi suol teplohai chu mi thaw dingin an inkhâwm a, chu chu ka lo hriet si nawh. Ma nuom lovin an mi sawisa hrep a.

¹⁶Ruoiṭhenaa nuiza fiemthu hriltuhai ang mei meiin, An ha an mi râwt khum a.

¹⁷LALPA, nangin ieng chen am i en ding a na? Ka hringna hi suksiet an tumnaa inthawk chun sansuok la; Ka nei suntak hi sakeibakneia inthawk chun sansuok rawh.

¹⁸Inkhâwmna ropuitaka chun lâwmthu hril ka ti che a, Mi tamtak laia chun inpâk ka ti che.

¹⁹Ka hmêlmahai chun indiknawtakin mi diriem naw raw hai se, Ieng ni lova a mi theidatuhai chu an mitin inbe naw bawk raw hai se.

²⁰Inremna thu hrim an hril si naw a, Hi rama um ṭawk ṭawkin hlêmna thuhai an ngaituo lem a nih.

²¹Anih, an bauin an mi kâk khum puou a, “Chei! Chei! ei mit ngeiin ei hmu tah,” an ti a.

²²Aw LALPA, nangin i hmu a tosan naw rawh, Aw LALPA, mîn hlat naw rawh.

²³Ka Pathien le ka LALPA, ka ro rêl dingin, Anih, ka thuha mi ṭan dingin, insukhar la, meng rawh.

²⁴Aw LALPA ka Pathien, i felna ang peiin ro mi rêlpêk la, Anni chun mi diriem naw raw hai se.

²⁵An lungrilin, “Chei! chuong ang chu a ni annâwm ei dit chu,” ti naw raw se. “Ama chu ei lem zo tah,” ti naw bawk raw se.

²⁶Ka sietna chunga lâwmhai chu muolphotak le thuokdawngtakin um hai sienla, Ka chunga insuklienhai chu muolphona le inzakna insiltirin um raw se.

²⁷Ka felna chunga lâwmhai chu hlima khêkin lâwmtakin um sienla, Anih, “A siehlaw vângneina chunga lâwm hlak LALPA chu, Chawimawiin um raw se,” ti rawp raw hai se.

²⁸Chuongchun, ka lei hin i felna thu hril a ta, Nangma inpâkna thu khawm sûnnithlâkin hril bawk a tih.