Read Hmar INPÂKNA HLA BU 37 Bible Online

INPÂKNA HLA BU 37 - Hmar bible

INPÂKNA HLA BU 37

¹David Inpâkna Hla Thil ṭha naw thawtuhai leiin insuklungngai nuom naw la, Fel nawtaka thawtuhai chu inhnar bawk naw rawh.

²Hlohna angin ât thlukin um vak an ta, Hna hring angin an vuoi ding a ni si a.

³LALPA chu ring la, thil ṭha thaw rawh, Hi rama hin um la, ringumna chu hnawt pei rawh.

⁴LALPA chunga chun lâwm bawk la, Chuongchun, i lungril dit zâwnghai chu pêng a ti che.

⁵I um dân ding chu LALPA chungah innghat la, Ama chu ring la, amain thâwng a tih.

⁶I felzie chu var angin insuoktir a ta, I thiemchangzie khawm chu sûnlai ang elin.

⁷LALPAA chun châwl la, ama chu nghâk fan fan rawh; Ama lampuia vângneina dawngtu lei chun insuklungngai nuom naw rawh, Ngaituo suolhai puitlintu lei chun.

⁸Lunginsen hi bânsan la, lungsenna chu sim rawh. Insuklungngai nuom naw, thilsuksuolah inchang thei a nih.

⁹Thil ṭha naw thawtuhai chu sukbohmangin an um ding a ni si a, LALPA nghâktuhai ruok chun ram hi hluong an tih.

¹⁰Sâwt nawtê hnungah mi rilo chu a um ta awm si naw a, Anih, a umna hmun chu en en hman la khawm um ta naw ni.

¹¹Thuhnuoirawlhai ruok chun ram hi hluong an ta, Inremna nasatak chungah lâwm an tih.

¹²Mi rilo chun mi fel a phierrûk a, A ha a râwt khum hlak.

¹³LALPA chun ama chu nuisan a ta, A ni a hung tlung ding a ni tah ti a hriet leiin.

¹⁴Rimsi le pasiehai sukthlu ding le, Umdân indikhai sukhlum dingin, Mi rilohai chun an kâwlhnâm an phawi a, an thalngul an kuoi bawk a.

¹⁵An kâwlhnâm chun anni lung chu sun a ta, An thalngulhai sukthliekin um bawk a tih.

¹⁶Mi fel thil tlâwmte nei chu, Mi rilo thil nei hnêr hnûr nêk chun a ṭha lem dai a nih.

¹⁷Mi rilo bânhai chu sukthliekin a um ding a ni si a, Mi fel ruok chu LALPAIN a chel zing hlak.

¹⁸LALPA chun mi ṭha famkim nihai chu a hriet a, An rohluo ding chu kumkhuoa um zing ding a nih.

¹⁹Hun ṭha nawah muolpho naw ni hai a, Ṭâm kumahai khawm khawp an tih.

²⁰Mi rilohai ruok chu bohmang an ta, LALPA dotuhai khawm phûl hlohna inno ang nîng an ta, Sukbohmangin um an ta, meikhuah inzâm hmang an tih.

²¹Mi rilo chun a pûk a, a pêk nâwk ngai naw a, Mi fel ruok chun mi a lunginsiet a, a pêk lem hlak.

²²A malsâwmna dawngtuhai chun ram hi hluong an ta, A ṭawngse phurtuhai chu sukbohmangin an um ding a nih.

²³LALPAIN mihriem chu a fena dingah a ṭhuoi hlak a, A kalchawi a ilâwm chu a sukdet hlak.

²⁴Tlu sienla khawm tlu letdêr chun um naw ni a, LALPAIN a kutin a chel zing si a.

²⁵Naupang ka lo ni ta a, tuhin tar ka ni ta a, Nisienlakhawm, mi fel chu mâksana a um ka hmu ngai naw a, A thlahai bu dâwl khawm ka hmu ngai nawh.

²⁶Sûnnithlâkin mi a lunginsiet a, ân pûktir hlak, A thlahai khawm an hamṭha hlak.

²⁷Suol fe san la, thil ṭha thaw rawh, Chuongchun, kumkhuoin chêng zing rawh.

²⁸LALPA chun rorêlna fel a ngaina si a, A mi inthienghai chu a fesan ngai naw a. Kumkhuoa dinga vawngṭhatin an um hlak a, Mi rilo thlahai ruok chu sukbohmangin um an tih.

²⁹Mi felhai chun ram hi hluong an ta, A sûnga hin kumkhuoin um an tih.

³⁰Mi fel bau chun varna thu a hril hlak a, A lei chun rorêl felna thu a hril bawk hlak.

³¹A Pathien dân chu a lungrilah a um a, A ke pên hrim hrim chu intawl naw nih.

³²Mi rilo chun mi fel chu a enthlit a, Sukhlum a tum hlak.

³³LALPAIN ama chu a kutah mâksan naw ni a, An ro a rêl pha chun thiemnaw inchangtir phal bawk naw ni.

³⁴LALPA chu nghâk la, a lampui chu hraw rawh, Chuongchun, ram chu hluo dingin chawimawi a ti che. Mi rilohai sukbohmanga an um lai chu la hmûng i tih.

³⁵Mi rilo chu nasataka thu neia, A mâwngna hmuna thing inder inno tak anga inbuk luoia a um lai ka hmu a,

³⁶Nisienlakhawm, lampuiah a[9] va fe a; chun, ngai ta, ama chu a um ta naw a. Anih, ka zawng a, nisienlakhawm, hmu zo a ni ta nawh.

³⁷Mi demkailo inchik la, mi indiktak chu en rawh, Chuong ang mi tâwpna ding chu lungmuongna a ni ding a ni si a.

³⁸Bawsetuhai ruok chu a ruola suksietin an um tâwl ding a na, Mi rilohai tâwpna ding chu sukbohmangna ning a tih.

³⁹Mi felhai sandamna ruok chu LALPA kuoma inthawk a ni a. Ama chu lunginzîng laia an kulbîng a ni hlak a.

⁴⁰LALPAIN anni chu a ṭhangpuiin a sanhim hlak a, Amaa chun an tlûklût leiin; Mi rilohaia inthawk chun a sanhimin a sandam hlak.