Read Hmar INPÂKNA HLA BU 38 Bible Online

INPÂKNA HLA BU 38 - Hmar bible

INPÂKNA HLA BU 38

¹David Inpâkna Hla; Inhrietsuoktir nâwkna. Aw LALPA, lunginsenin mi kâwk naw la, Lunginsenin mi thunun bawk naw rawh.

²I thalhai chu ka pangah ân bûr tlat a, I kutin a mi nam ngâwi ngâwi si a.

³I lungninawna leiin ka taksaa hin dam lai hrim hrim a um naw a, Ka suolna leiin ka ruahai hin hrisêl lai hrim a um bawk nawh.

⁴Ka rîtlonahai chun ka lu hi a chîm hmang a, Phur riktak ang ka zo ruol lo hi a nih.

⁵Kân vêtna leiin, Ka pawpnahai hi a hmawnin a khawhlo zo ta a.

⁶Ka na a, ka kûn rawng rawng a, Sûnnithlâkin lungngaiin kân vêl ruoi hlak.

⁷Ka kâwng hi a sa vut vut zing a, Ka taksaa khawm hin dam lai hrim a um nawh.

⁸Ka chau a, ka sil ûr a, Ka lungril inhawi nawna leiin kân rûm rak rak a,

⁹LALPA, ka dit zâwng po po hi i hmaah a um vawng a; Kân rûm khawm hi i kuoma chun thup a ni nawh.

¹⁰Ka lung hi ân lap dawr dawr a, thahrui ka nei ta naw a, Ka mit varna hlak chun a mi um naw san ta bawk a,

¹¹Mi hmangaituhai le ka ruolhai chu ka hri invawia inthawk hin an insiekieng hlak a, Ka laibunghai khawm hlatakah an ngîr hlak.

¹²Ka hringna sukbo tuma zawngtuhai chun an mi âwkna dingin chânghai an kam hlak a, Ka sietna ding zawngtuhai khawm chun thu ṭha nawtakhai an hril a, Sûnnithlâkin hlêmna thuhai an ngaituo hlak.

¹³Nisienlakhawm, kei chu mi nasêt angin hre lovin ka um a, Ṭawngtheilo bau ka ngailo angin ka um a.

¹⁴Anih, mi ṭawng hre theilo, A baua hrângna thu hrim suok ngailo angin ka um.

¹⁵Aw LALPA, nangma ka beisei si che a, Aw LALPA ka Pathien, nangin mi dawn i tih.

¹⁶“Chuong naw chun mi diriem an ta, Ka ke ân tlêu phingleh ka chungah insuklien rawi an tih,” ka ti a nih.

¹⁷Kân bai vâng vâng si a, Ka lungngaina khawm ka hmaah a um rawp a nih.

¹⁸Ka rîtlona chu ka puong a, Ka suolna leia lungngaiin ka um a.

¹⁹Nisienlakhawm, a mi dotuhai chu an thothâng a ṭhain, an hrât a, Indiknawtaka a mi theidatuhai chu tamtak an nih.

²⁰Thil ṭha thil suola thung hlaktuhai hi, Thil ṭha ka hnawt leiin a mi dotuhai an nih.

²¹Aw LALPA, mi fesan lul naw la, Aw ka Pathien, mîn hlat lul naw rawh.

²²Aw LALPA, a mi sandamtu, A mi ṭhangpui dingin inhmaw rawh.