Read Hmar INPÂKNA HLA BU 39 Bible Online

INPÂKNA HLA BU 39 - Hmar bible

INPÂKNA HLA BU 39

¹Hla ṭhuoitu ta dingin: Jeduthun ta ding. David Inpâkna Hla Ka lei hin thil ka suksuol nawna dingin, Ka umdânhai hi vêng ṭhang ka ta; Mi rilohai ka hmaa an um sûng po, Ka bau hi hmûrkhitnain khit ka tih, ka ti a.

²Chuongchun, to zingin ṭawng lovin ka um a, A ṭha tienga khawm ka to zing a; Nisienlakhawm, ka lungngaina chu chawkthoin a um lem hman a.

³Ka sûnga hin ka lungril chu a sa vut vut a; Ka ngaituo ka ngaituo chun mei chu a chawk suok a; Chun, ka lei hin thu ka hril ta a.

⁴“LALPA, ka tâwpna ding le ka dam chen ding chu, Iengtin am a na ti mîn hriettir la, Ka derdêpzie hi mîn hriettir rawh”.

⁵Ngai ta, ka dam chen hi kutpha bawk chen chauin i siem a, Ka kum hi i mithmua chun ieng khawp khawm a ni naw a; Mi tin an ṭhat lai tak khawmin an pumin iengkhawm an ni nawh.

⁶Mi tin hi hlim angin an lêng takmeu a, An buoi thlâwn takmeu a nih. Ro ân khâwl khâwm hlak a, a hluotu ding a hriet si naw a.

⁷Chun, LALPA, tuhin ieng am a na ka nghâk chu? Nangmaah a nih ka beiseina a um chu.

⁸Ka bawsietna po poa inthawkin mi sansuok la, Mi invêt hrilsietin mîn umtir naw rawh.

⁹Nangma thaw a ni leiin, Ka ṭawng naw a, ka bau ka ka bawk nawh.

¹⁰I mi vuokna hi ka kuoma inthawkin mi la hmangpêk la, I kutthlâka sukbohmang ka ni hi.

¹¹Mi a bawsietna leia kâwknahaia i thunun hin, A ditumna hi hângthim angin i suksiet hlak: Mi tin hi iengkhawm an ni nawh.

¹²Aw LALPA, ka ṭawngṭâina hi ngai la, ka konaa hin na sit la, Ka mitthli tla hi tosan naw rawh: I mikhuol ka na, A mi thlatuhai po po ang khan khuolchâm el ka ni si a.

¹³Aw, hitaka ka suok a, ka um naw sawng dai hma hin, Ka har nâwkna dingin mi hla rawh.