Read Hmar INPÂKNA HLA BU 40 Bible Online

INPÂKNA HLA BU 40 - Hmar bible

INPÂKNA HLA BU 40

¹Hla ṭhuoitu ta dingin, David Inpâkna Hla. LALPA chu ka nghâk fan fan a, Chuongchun, ama chu ka kuom tieng a hung thle a, Ka ko chu a ngai ta a.

²Bohmangna khura inthawkin, chirhak inhnâktaka inthawk chun a mi khai suok ta a: Chun, ka ke chu lungpui chungah ân nghat a, ka ke pênhai chu a sukdet a.

³Hla thar ka bauah a sie ta bawk a, ei Pathien inpâkna chu: Mi tamtakin chuong chu hmûng an ta, ṭî bawk an ta; LALPA chu ring tâng an tih.

⁴LALPA chu a ringsana nei a, Chapohai le khêl tienga pêthai ngaisaklo mi chu, a hamṭha ie;

⁵Aw LALPA ka Pathien, nangin thilmak i thawhai le, Keini tieng i ngaituonahai hi a tam bêk bêk a, Chuong chu i hmaa suklang sêng ruol a ni naw a, Inhriettirin hril ding ni lang, Ṭiemsêng ruol ni naw ni.

⁶Inthâwina le thilinhlân chunga hin lâwmna hrim i nei naw a: Ka nahai hi i mi sukvarpêk ta a; Pumrawhmanga thilinhlân le suol ta dinga thilinhlân chu i phût nawh.

⁷Chu phingle chun keiin, “Ngai ta, ka hung ie, Lekhabu ziela chun ka thu ziek a nih:

⁸Aw ka Pathien, i dit zâwng thaw hi ka lâwm zâwng tak a nih: Anih, i dân thu chu ka lungrilah a um zing ie,” ka ta.

⁹Inkhâwmna ropuitaka chun felna chanchin ṭha ka khêkpui a, Aw LALPA, ngai ta, Ka bau hi inro naw ning ti i hriet deh.

¹⁰I felna chu ka lungril sûngah ka ip naw a; I ringumna le i sandamna thu chu ka khêkpui lem a, I ngilneina le i takna chu inkhâwmpui ropuitaka mihai kuoma chun ka thup naw a.

¹¹Aw LALPA, i lainatnahai chu ka kuomah inro naw la, I ngilneina le i takna chun mi humhim rawp raw se.

¹²Thil ṭha naw tiem sêng lo chun an mîn huolvêl si a, Ka rîtlonahai chun an mi hnawt phâk a; Chuongchun, ka dâk thei ta naw a; Chuong chu, ka samzaihai nêk hin a tam lem a, ka lungril hi a châu ta a.

¹³Aw LALPA, lunginsiettakin mi sanhim la, Aw LALPA, mi ṭhangpui dingin inhmaw rawh.

¹⁴Ka hringna sukbo tuma zawngtuhai chu, Muolphotak le inzaktakin um tâwl hai sienla, Ka sietna chunga lâwmhai chu, Innghatkîrtirin sukzakin um raw hai se.

¹⁵“Chei! Chei!” mi tituhai chu, An muolpho leiin lunginzîngtakin um raw hai se.

¹⁶A zawngtuhai po po che chu nangmaa chun hlimtak le lâwmtakin um hai sienla, I sandamna ngainatuhai chun, “LALPA chu chawimawiin um raw se,” ti rawp raw se.

¹⁷Kei chu rimsi le pasetak ka nih, Nisienlakhawm, LALPAIN a mi ngaituo hlak. Nang chu a mi ṭhangpuitu le a mi sandamtu i na; Aw ka Pathien, sâwt riel lul naw raw khai.