Read Hmar INPÂKNA HLA BU 42 Bible Online

INPÂKNA HLA BU 42 - Hmar bible

INPÂKNA HLA BU 42

¹(42—72) Hla ṭhuoitu ta dingin: Kora naupahai Maskil Sakhi vadungte tui châka ân thuok hlawp hlawp angin, Aw Pathien, ka hringna hi nangma châkin ân thuok hlawp hlawp a nih.

²Ka hringna hi, Pathien châkin, Pathien hring châkin a dangchâr a nih: Iengtik am Pathien hma tlung ka ta, inlang ka ti aw?

³Ka mitthli hi asûn azânin ka bu a nih, “Khâwlai am i Pathien teh?” an mi lo ti zawmzawt a.

⁴Hieng thil hi ka hriet zing a, ka hringna hi ka sûngah ka bunthlâk a, Mipui laia ka fe a hlimna le inpâkna ri leh, mi tamtak ruoiṭhe, Pathien biekin pana an hma ka ṭhuoi hlakzie ang dâm kha.

⁵Aw ka hringna, iengdinga i kûn zing am? Iengdinga ka sûnga hin i buoi am a na? Pathien beisei rawh, a hmêla damna lei chun, Ama chu ka lân pâk ding a ni si a.

⁶Aw ka Pathien, ka hringna ka sûnga hin a kûn zing a: Chuleiin, Jordan le Hermon rama inthawk dâm, Mizar tlânga inthawk dâm hin ka hriet zing che a nih.

⁷I tui luong ri hum humhai hin tui inthûk le tui inthûk chu an inko a, I tuifâwn le i tui insawk po po chun a mi chîm tlum tah.

⁸Nisienlakhawm, LALPAIN a ngilneina chu sûnah thu pêng a ta, A hla chun zânah mi umpui a tih, Ka hringna Pathien kuoma ṭawngṭaina chun.

⁹Pathien ka lungpui kuoma chun, “Iengdinga i mi theinghil am? Iengdinga a mi dotuhai nêksâwrna leia lungngaia kân vâi ruoi hlak am a na?” tîng ka tih.

¹⁰Ru inlang râwtin a mi dotuhai chun an mi hrilsiet hlak a. “Khâwlai am i Pathien teh?” an mi lo ti zawmzawt a.

¹¹Aw ka hringna, iengdinga i kûn zing am? Iengdinga ka sûnga hin i buoi am a na? Pathien beisei rawh, ama chu ka lân pâk ding a ni si a. Ka hmêl sukmawitu le ka Pathien chu.