Read Hmar INPÂKNA HLA BU 44 Bible Online

INPÂKNA HLA BU 44 - Hmar bible

INPÂKNA HLA BU 44

¹Hla ṭhuoitu ta dingin: Kora naupahai Inpâkna Hla. Maskil. Aw Pathien, tienlaia an dam laia i thilthawhai kha. Kan thlatuhaiin an mi hril, kan nain kan hriet,

²Nangin i kutin hnam tin chu i hnawt suok a, anni chu i phun ta thung a, Mi tin chu i sukrimsi a, anni chu în zârlientir thung a.

³Ram chu hluo dinga anni kâwlhnâma an lâk a ni naw a, Anni bâna insandam an ni bawk nawh; An chunga i lâwm leiin, I kut changtieng le, i bân le i hmêl varin a ni lem.

⁴Aw Pathien, nang chu ka Lal i nih, Jakob sanhimna dingin thu pe rawh.

⁵Nangma leiin a mi dotuhai chu sikthlûng kan ta, I hming leiin a mi thawtuhai chu chîl hrep kan tih.

⁶Ka thalngul hi ka ring âwm si naw a Ka kâwlhnâm hin mi sandam bawk naw ni.

⁷A mi dotuhaia inthawk chun nangin i mi sandam ta lem a, A mi theidatuhai chu i sukmuolpho ta bawk a.

⁸Sûnnithlâkin Pathien kan suong a, I hming chu kumkhuoin inpâk bawk kan tih.

⁹Tu ruok hin chu nangin i mi ngaitha a, i mi sukzak a, Kan sipai ruol lai hlak i suok ve ngai naw a,

¹⁰A mi dotuhaia inthawk chun i mîn tlânsiettir hlak a, A mi theidatuhai chun sum chu an nuom nuomin an lâk hlak.

¹¹Nangin fâk dinga ruot berâm angin i mi pêk a, Hnam tin lai chun i mi sukdar bawk a.

¹²I mihai hi iengkhawm nilovah i zawr a, An man chu i hausakpui chuong si nawh.

¹³Nangin kan vêla mihai hrilsietin i mîn umtir a, Kan dep vêla mihai hmusit le nuisanin i mîn umtir bawk a.

¹⁴Nangin hnam tin lai chun a se tieng hrilkhinaah i mîn umtir a, Mi tin laia mihai lu thinkhumin i mîn umtir bawk a.

¹⁵Kân zakna hi sûnnithlâkin ka hmaah a um hlak a, Ka muolphona hin a mîn khum zo tah,

¹⁶Hrilhnuoltu le hrilsetu râwl lei le, Hmêlma le phubalatu leiin,

¹⁷Chuong po po chu kan chungah a tlung a; nisienlakhawm, kan theinghil ngai naw che a; I thuthlunga hin a tehlêmin kan thaw ngai bawk nawh.

¹⁸Kan lungril hi a nghakîr naw a, Kan ke pênhai hin i lampui chu a pêtsan ngai bawk nawh.

¹⁹Nangin sihalhai umnaa mi sawisa hrepa, Thina deihlima an mi khumna dingin.

²⁰Kan Pathien hming chu theinghilin, Ram dang pathien tienga kan kuthai kan phar chun amanih,

²¹Pathienin chu chu a zawng suok naw ding am a nih? Lungril thup rûkhai hi a hriet zing si a.

²²Anih, nangma leiin sûnnithlâka thatin kan um hlak a, Berâm that dinghai anga ngai kan nih.

²³Aw LALPA, har ta la, iengdinga i in am? Meng la, kumkhuo chun mi ngaitha naw.

²⁴Iengleiin am i hmai i thup a, Kan rinumzie le nêksâwr kan tuorzie hi i theinghil hlak chu?

²⁵Kan hringna hi pilvut sikin a kûn a, Kan phîng hlak hnuoiah a kawp tlat si a.

²⁶Mi ṭhangpui dingin tho la, I ngilneina lei chun mi sansuok rawh.