Read Hmar INPÂKNA HLA BU 45 Bible Online

INPÂKNA HLA BU 45 - Hmar bible

INPÂKNA HLA BU 45

¹Hla ṭhuoitu ta dingin: Sosanima sak ding Kora naupasalhai Inpâkna Hla. Maskil. Hmangaina Hla. Ka lungril hi thil ṭhain a liem zar zar a; Laltak chungchâng thua ka thil phuok chu ka hril ding a nih: Ka lei hi lekhaziek thiemtak kawlawm a nih.

²Mihriem nauhai nêk hin i hmêl a ṭha lem a, Lunginsietna hi i hmûra chun buok a nih; Chuleiin, Pathienin kumkhuoa dingin mal a sâwm che a nih.

³Aw mi hrât, i kâwlhnâm i kâwngah vawng rawh. I ropuina le i mawina leh.

⁴Thutak le thuhnuoirawlna le felna leiin, I mawina inbelin, aitluongtakin sakawr chunga chuongin fe pei rawh. Chuongchun, i kut changtieng chun thil râpthlâktakhai ân chûktir ding che a nih.

⁵I thal chu ân zum a, Laltak dotuhai lungkhura chun ân bûr zing a, Mi tin chu i hnuoiah an tlu hlak a.

⁶Aw Pathien, i lalṭhungpha chu chatuonin a um ding a nih, Thlierbîkna nei lona lalhmawl chu i ram lalhmawl chu a nih.

⁷Felna chu i ngaina a, rîtlona chu i theida kha; Chuleiin, Pathien, i Pathien chun i ruolhai nêka nasain, Hlimna hriek a nâl ta che hi.

⁸I silfên po po chu murra rim dâm, aloe rim dâm, thingzungthak rim dâm ân nam rum rum a; Saihaa siem lal inhaia ṭingṭang chi tum tum ri hung suokhai chun a sukhlim che a ni hi.

⁹I nuhmei ṭhahai laia chun lalhai naunuhai an ṭhang ve a, I changtieng chun Ophir rângkachaka incheiin lalnu chu a ngîr a.

¹⁰Aw ka naunu, ngai la, ngaituo la, na sit rawh; I mihai le i pa ina mihai chu theinghil rawh;

¹¹Chuongchun, laltakin i hmêl ṭhatak hi a dit ding annâwm, Ama chu i Lalpa a ni si a; chuongchun, ama chu chibai bûk hlak rawh.

¹²Tura naunu chu thilpêk chawiin chutaka chun um a ta, Mi laia hausahai ngei chun i ditsakna hung ngên an tih.

¹³Lal in sûnga lal naunu chu a ropui vêl vawng a, A silfên chu rângkachaka ṭiel mawi a nih.

¹⁴Puon ṭhui mawi silin laltak kuomah ṭhuoi an ta, Ama zuitu nunghâk a ruolhai chu, I kuomah ṭhuoi an tih.

¹⁵Lâwmtak le hlimtakin ṭhuoi an ta, Laltak ina chun lût an tih.

¹⁶I pahai aiah i nauhai um an ta, Anni chu hnuoi chung po poa hin milienah siem i tih.

¹⁷I hming hi suon po poa hriet zing dingin siem ka ta, Chuleiin, mi tinin kumkhawtluongin lâwmthu hril an tih.