Read Hmar INPÂKNA HLA BU 46 Bible Online

INPÂKNA HLA BU 46 - Hmar bible

INPÂKNA HLA BU 46

¹Hla ṭhuoitu ta dingin:Kora naupasalhai Inpâkna Hla. Pathien chu ei inhumhimna le ei hrâtna, Lunginzîng laia ṭhangpui vartu hnai zing a nih.

²Chuleiin, leilung hi hung danglamin, Tlânghai hi tuisuoriet sûng daiah insawn sien khawm ṭi nâwng ei ta;

³A tuihai chu inri hum humin, so bur bur sienla khawm, A fâwn nasa leiin tlânghai hi inhnîng dur dur sien khawm ṭi chuong bawk nâwng ei tih.

⁴Vadung pakhat a um a, chu kau chun Pathien khawpuihai chu a suklâwm hlak, Achunghnungtak umna hmun inthieng chu.

⁵Pathien chu a lai takah a um a, inhnîng naw ni a, Pathienin khawfingchat pha chun ṭhangpui a tih.

⁶Hnam tin an inri hum hum a, ramhai chu ân hnîng a, Ama chun a râwl ân suoh a, leihnuoi hi ân tui zo ta a.

⁷Sipaihai LALPA chu ei kuomah a um a, Jakob Pathien chu ei kulbîng insâng a nih.

⁸Hung unla, LALPA thilthawhai hi en ta u, Leihnuoia thil a suksietziehai hi.

⁹Ama chun indonahai chu kâwlkawdawng chenin a sukbo hlak a, Thalngul chu a sukthliek a, fei chu a sât bawng hlak a. Tawlailîrhai chu meiah a raw hmang hlak.

¹⁰To unla, Pathien ka nih ti hi hre ro, Hnam tin lai chawimawiin um ka ta, hnuoia hin chawimawiin um ka tih.

¹¹Sipaihai LALPA chu ei kuomah a um a, Jakob Pathien chu ei kulbîng insâng a nih.