Read Hmar INPÂKNA HLA BU 48 Bible Online

INPÂKNA HLA BU 48 - Hmar bible

INPÂKNA HLA BU 48

¹Hla: Kora naupasalhai Inpâkna Hla. LALPA chu a ropui a, nasataka inpâk ding a nih; Ei Pathien khawpuiah, a tlâng inthienga chun.

²Insâng zâwnga mawitak, khawvêl po po hlimna chu, Zion tlâng chu a nih, hmar tieng panga, Lal ropuitak khawpui chu.

³A lal inahai chun Pathien chun kulbîng insâng a nizie ân hriettir a.

⁴Ngai ta, lalhai chu an pung khâwm a, An fe tlâng tah a nih.

⁵An hmu a; chuongchun, mak an ti a, An lunginzîng a, an tlân hmang ta vak a.

⁶Chutaka chun inthinnain a man a, Nuhmei nau invawi natna angin a man bawk a.

⁷Khawsak thliin, Tarsis lawnglienhai chu i suksiet a.

⁸Sipaihai LALPA khawpuiah, ei Pathien khawpuia chun, Naa ei hriet ang ngeiin ei hmu tah; Pathienin chu khawpui chu kumkhuoa dingin sukdet a tih.

⁹Aw Pathien, i biekin sûng rila chun, I ngilneizie hi kan ngaituo tah.

¹⁰Aw Pathien, i hming ang ngeiin, Nangma inpâkna chu kâwlkawdawng chenin a um a; I kut changtieng chu felnain a sip a nih.

¹¹I rorêlhai leiin, Zion tlâng chu lâwmtakin um sienla, Juda naunuhai chu hlimtakin um raw se.

¹²Zion chu vêlin fe huol unla, A râlvêng in insânghai khawm chu tiem ro.

¹³A kulhai chu inchik ngun unla, A lal inhai chu ngaituo ro; Ruolthar hung um nâwkhai kuoma in hril theina dingin.

¹⁴Hi Pathien hi kumkhawtluonga ei Pathien a ni ding a ni si a, Thi chen khawma a mi ṭhuoitu ning a tih.