Read Hmar INPÂKNA HLA BU 49 Bible Online

INPÂKNA HLA BU 49 - Hmar bible

INPÂKNA HLA BU 49

¹Hla ṭhuoitu ta dingin: Kora naupasalhai Inpâkna Hla. Mi tinrênghai, hi hi ngai unla, Khawvêla um po pohai na lo sit ro.

²Mi chîn le mi lien, Mi hausa le mi rimsi khawmin,

³Ka bau hin varna thu hril a ta, Ka lungril ngaituo chu hrietthiemna thu nîng a tih.

⁴Tekhithuah ka na sit ka ta, Ka thu ril hril chu ṭingṭangin hrilfieng ka tih.

⁵Ni ṭha nawahai, ka kekhawng bulah rîtlona chun a mîn huolvêl khawmin, Iengdingin am ṭîng ka ta?

⁶Mâni sum ring a, Mâni hausakna nasatak suongtuhai chun,

⁷Tukhawmin an unau khawm intlan thei tawp naw ni a, Pathien kuomah intlanna pe pêk thei bawk naw ni hai:

⁸An hringna intlanna ding chun thil nasatak sêng ding a na, Kumkhuo khawma a tina tin naw el ding a nih:

⁹A dam zing a, Hmawnna a hmu nawna ding chun.

¹⁰Mi varhai khawm an thi a Mi invêt le mi ngawnghai khawm an bohmang ve ve a An sum mi danghai an mâksanpêk hlakhai chu an hriet si a.

¹¹An lungril ngaituo dân chu, An inhai chu kumkhuoa um ding ang le, An umnahai chu suon po po chena um ding ang a nih. An ramhai chu anni hming ruok an inputtir hlak.

¹²Nisienlakhawm, mihriem hi chawimawiin an um zing naw a. Sa bohmang hlakhai ang el hi an nih.

¹³Invêttaka mâni inringzohai chan, Mâni sumneia lungawi elhai tâwpna chu hi hi a nih:

¹⁴Berâm ruol angin Seol ta dinga ruot an na, Thina chu an vêngtu ning a ta, Zîngtieng chun mi indiktakhaiin an chungah thu nei an ta, An umna hrim hrim a um nawna dingin, an mawina chu Seol suksiet ding nîng a tih.

¹⁵Ka hringna ruok chu Pathienin Seola inthawkin intlan suok a tih, Ama chun a mi lâwm âwm si a.

¹⁶Mi sukhausaka a hung um a, A sungkuo ropuina chu a hung nasat deu deu khawmin ṭi naw rawh:

¹⁷A thi pha chun iengkhawm a sawm naw ding a na, A ropuina chun a zui thlâk âwm si naw a.

¹⁸A dam laiin insukengthâwl sienla khawm, (A hlawtlingna leiin mi inpâk hlaw sien khawm).

¹⁹A thlatuhai suon kuomah fêng a tih, Iengtika khawm var hmu ta lo dinghai kuoma chun.

²⁰Mihriem chawimawia uma, hrietthiemna nei si lo chu, Sa bohmang hlakhai ang el hi an nih.