Read Hmar INPÂKNA HLA BU 50 Bible Online

INPÂKNA HLA BU 50 - Hmar bible

INPÂKNA HLA BU 50

¹Asaph Inpâkna Hla Iengkimthawthei, Pathien ngei, LALPA chun thu a hril a, Leihnuoi hi nisa suoknaa inthawka a tlâkna chenin a ko ta a.

²Mawi famkimna, Ziona inthawk chun, Pathien chu a var suok ta a.

³Ei Pathien chu hung a ta, to zing naw nih: A hmatieng chun mei kâng dur dur a ta, A vêla chun thlipui nasatak hrâng bawk a tih.

⁴A mihai ro a rêl theina dingin, Chungtieng vânhai le hnuoi hi ko a tih,

⁵“Ka mi inthienghai, ka kuomah hung ṭhuoi khâwm ro, Ran thata inthâwia ka kuoma thu thlungtuhai chu,” tiin.

⁶Chuongchun, vânhai khin a felna chu tlânginsampui a ta, Ama Pathien ngei chu rorêltu a ni si a.

⁷“Aw ka mihai, ngai ta u, thu ka hril ding a nih, Aw Israel, ngai ta, kân hriettir ding che a nih: Kei hi Pathien, i Pathien ngei chu ka ni hi,

⁸I inthâwinahai leiin kâwk naw ning chenga a, I pumrawhmang thilinhlânhai chu ka hmaah a um rân si a.

⁹I ina inthawk chu bâwngchal hrim hrim la suok naw ning, I ran huona inthawkhai chun kêltehai khawm la suok bawk naw ning.

¹⁰Ramhnuoia sa tinrênghai hi ka ta a ni si a, Tlâng sâng khat lai chunga ran umhai khawm chu.

¹¹Tlânga vate po po ka hriet vawng a, Ramsahai khawm hi ka ta a nih.

¹²Phîngṭâm lang khawm hril naw ning cheng a, Leihnuoi le a sûnga thil um po pohai hi ka ta a ni si a.

¹³Bâwngchal sa ka fâkin, Kêl thisen ka dâwn ding am a nih?

¹⁴Pathien kuoma lâwmthu hrilna inthâwina inhlân lem la, I thutiem khawm Achunghnungtak kuomah hlen rawh.

¹⁵Chun, lunginzîng ni chun mi ko la, Sanhim ka ti che, chuongchun, nangin i mi chawimawi ding annâwm,” a ti a.

¹⁶Mi rilo kuoma ruok chun Pathienin, “Ka thuruothai hrilsuok theina i nei am a nih? Annawleh, ka thuthlung hi iengtiziea i baua sâm am i ni a?

¹⁷Thunun i theida a, Ka thuhai hi i hnungtieng i dehâwn pei si a.

¹⁸Inru i hmu chun i remtipui a, Uirepahai hlak în kawppui bawk hlak.

¹⁹I bau hi suol kuomah i pêk a, I lei hin hlêmna a siem bawk hlak.

²⁰Ṭhungpumin i unau i sawisêl a, Mâni nuhai naupasalhai ngei chu i hêk hlak.

²¹Chuong thil chu i thaw a; nisienlakhawm, ka to zing a; Chuongchun, nangma ang charah i mi ruot hlak a, Nisienlakhawm, kâwk ka ti che a i mithmuah indawt peiin suklang ka tih.

²²Nangni Pathien theinghiltuhai, hi hi ngaituo ta u khai! Chuong naw chun, keinâwi ka ti cheu a, nangni sanhimtu hrim an um âwm si nawh a.

²³Tukhawm lâwmthu hril inthawina inhlân taphawt chun a mi chawimawi hlak, Chun, a um dân takinningtaka vawngtu kuoma chun, Pathien sandamna inentir ka tih,” a ti a.