Read Hmar INPÂKNA HLA BU 52 Bible Online

INPÂKNA HLA BU 52 - Hmar bible

INPÂKNA HLA BU 52

¹Hla ṭhuoitu ta dingin. David Maskil: Edom mi Doeg chun Saula kuomah, “David chu Abimelek inah a fe,” tia a hung hril laia mi. Aw mi hrât, iengdinga thil suksuol i suong am a na? Pathien zaidamna chu a um zing hlak a nih.

²Thil suol tak thaw i suongtuo hlak a, I lei chu rêpvâw chem ngeitak ang a na, Khêlhlip a sâksuok hlak.

³Ṭhat nêkin suol i ngaina lem a, Thu indiktak hril nêkin khêlthu hril i ngaina lem bawk a.

⁴Aw, nang lei mi hlêmhmang, Thu mi lem zo thei po po chu i ngaina hlak.

⁵Pathien chun kumkhawtluonga dingin sukse vêng a ti che, Man a ti che a i umnaa inthawkin kei dawk a ti che a, Mi hring rama inthawk hin kei suok dai a ti che.

⁶Mi felhai khawmin an hmu chun ṭîng an ta, Nuisan an tih.

⁷“En ta u, hi mi hi a nih, Pathien a kulbînga siem nuom lo a, A hausakna nasatak ring lem a, A suolnaa insukhrât vei chu,” tiin.

⁸Kei ruok chu chu Pathien ina oliv thing inder hlut hlut ang ka na, Pathien zainêmna chu kumkhawtluongin ring ka tih.

⁹Chu chu i thaw leiin kumkhuoin lâwmthu hril ka ti che a, I mi inthienghai mithmua chun i hming chu nghâk zing ka tih, a ṭha si a.