Read Hmar INPÂKNA HLA BU 53 Bible Online

INPÂKNA HLA BU 53 - Hmar bible

INPÂKNA HLA BU 53

¹Hla ṭhuoitu ta dingin: Mahalath-a sak ding. David Maskil Mi invêt chun a lungrilin, “Pathien hrim a um nawh,” a ti hlak a; Tukhawm thil ṭha thaw hrim an um nawh. An se zo a, thil suol tirdakumtak an thaw a;

²Hrethiema Pathien zawng hrim hrim an um am? ti hmu dingin, Pathienin vâna inthawkin mihriem nauhai hi a zuk en a.

³An kîr nâwk ta seng a, pawrchetakin an lo um ta vawng a; Tukhawm thil ṭha thaw hrim an um nawh, pakhat bêk khawm an um dêr nawh.

⁴Thilsuol thawtuhai chun hriet hrim hrim an nei naw am a nih? Bei an fâk angin ka mihai an fâk zo vawng hlak a, Pathien hlak an ko ngai bawk nawh.

⁵Ṭitna hrim hrim um nawnaa chun ṭi êm êmin an um a. Pathienin thaw tuma eptu che ruhai chu a sukdar ta si a; Pathienin anni chu a pei thlâk leiin i sukmuolpho ta a.

⁶Israelhai sandamna chu Ziona inthawkin suok sienla chu aw! Pathien chun a mihai sala an um chu a ṭhuoi kîr nâwk pha chun, Chu pha chun Jakob hlim tâng a ta, Israel lâwm tâng an tih.