Read Hmar INPÂKNA HLA BU 55 Bible Online

INPÂKNA HLA BU 55 - Hmar bible

INPÂKNA HLA BU 55

¹Hla ṭhuoitu ta dingin: ṭingṭang chi tum tuma sak mi David Maskil Aw Pathien, ka ṭawngṭainaa hin nâ lo sit la, Lunginsiet ka hninaa hin inthup naw rawh.

²Mi lo ngai la, mi hung dawn rawh. Ka lunginzîng leiin kân vêl ruoi a, kân rûm hlak;

³A mi dotuhai ri lei le, Mi rilo hnesiena leihaiin. Anni chun suolnain an mîn hlumkhumin, Lunginsenin an mi suknawmna si a.

⁴Ka sûnga hin ka lungril a na êm êm a, Thina ṭiumhai chun an mi del a.

⁵Ṭitna le inthinnain an mi baw a, Thlabârnain a mîn khum zo tah.

⁶Chuongchun, “Aw, vaṭhu anga thla nei ka va nuom de! Chuongchun, vuong dai ka ta, lungmuongtakin um ka tih.

⁷Ngai ta, hlatakah inlêng ka ta, Thlalêrah um ka ta,

⁸Thli hrâttak le, thlipui hi, Inbîkna hmunah ka mâksan vak ding bah,” ka ti a.

⁹Aw LALPA, an lei chu suksiein sukthlêr la, Khawpuia chun inpâwngnêkna le inkhîkinkhalna ka hmu si a.

¹⁰A sûn a zânin khawpui chu kul tlângah an vêl an vêl a, A sûnga chun suolna le rinumna a um bawk a.

¹¹Rîtlona a sûngah a um a, Hlêmna le zâwrna chun a kawtthlêr chu a suoksan ngai nawh.

¹²A mi hrilsetu chu hmêlma a ni si naw a, Ni sienla chu ka tuor thei lem ding bah; Ka chunga insuklien chu a mi theidatu a ni bawk naw a: Ni sienla chu kân bîkhmangsan ding bah.

¹³Nisienlakhawm, nang, ka mi inangpui, Ka ruol, ka ruol pâwlngei i ni mieu si a.

¹⁴Bau thlumtakin ei inbiek hlak a, Mipui laia chun Pathien biek inah ei lêng hlak kha.

¹⁵Thina an chungah hung tlung thut sienla, Khur sûnga chun a hringin fe thla raw hai se; Rîtlonahai chu an umnaa le an sûngahai an um si a.

¹⁶Kei chun chu Pathien chu ko ka ta, Chuongchun, LALPAIN mi sandam a tih.

¹⁷Zântieng dâm, zîngkâr dâm, sûna dâm ka lunginzîngna thu hrilin inrûm ka ta: Chuongchun, ama chun ka râwl lo ngai a tih.

¹⁸Ka chunga an mi thawnaa inthawk chun ka hringna hi lungmuongtakin a sanhim ta a; A mi thawtuhai chu an tam si a.

¹⁹Pathien, tiena chena um zing ta chun, Ngai a ta, anni chu suktlâwm a tih. Danglamna nei ngailo, Pathien ṭî ngai si lohai chu.

²⁰Ama le inremhai chunga chun a kut ân lêt a, A thuthlung chu a sukkhawhlo ta a.

²¹A bau chu nênetui kîng angin a tlawr a, A lungril ruok chu indona a ni si a; A thuhai chu hriek nêkin ân nâl a, Nisienlakhawm, kawlhnâm phawisahai a ni si a.

²²I rikphur chu LALPA chunga innghat la; chuongchun, amain sukhrât a che, Mi fel chu iengtika khawm sukhnîng phal naw nih.

²³Nisienlakhawm, aw Pathien, nangin anni chu bohmangna khura chun infe thlâktir i ta, Thisen insuo hmang ke le hlêm hmang mihai chu an dam sûng chenve khawm dam naw ni hai: Kei ruok chun nang chu ring ka ti che.