Read Hmar INPÂKNA HLA BU 58 Bible Online

INPÂKNA HLA BU 58 - Hmar bible

INPÂKNA HLA BU 58

¹Hla ṭhuoitu ta dingin: Altashhetha sak ding. David Inpâkna Hla. Aw rorêltuhai, felna thu maw in hril tak tak? Aw mihriem nauhai, indiktakin maw ro in rêl?

²Anih, in lungrila chun thil suoltak in thaw hlak a; Hnuoia in kuta thil nunsetaka thaw chu in bûk hlak a.

³Mi rilohai chu an nu phîng sûnga inthawk hrimin Pathiena inthawka ṭhein an um a; An pieng phingleh khêlthu hrilin an invâk hmang hlak.

⁴An tûr chu rûl tûr ang a na, Rulrîel nasêt, a na hip hlak ang chu an nih.

⁵Chu chun rûl dawiinvêt theihai râwl chu a ngai naw a; Ieng anga thiem khawmin dawi hai sien khawm.

⁶Aw Pathien, an baua chun an hahai chu suktlam la, Aw LALPA, sakeibaknei vânglaihai ha lientak takhai chu khel dawk la,

⁷Anni chu tui hrâttaka luong angin intui hmang hai sienla, A thalhai a tinin[10], sât fik angin um pei raw hai se.[11]

⁸Kawngkawrawi, intui a, bo el hlak ang hi ni sienla: A hun nawa nuhmei nau nei, nisa hmêl hrim hrim hmu lo ang hi ni raw se.

⁹In bêlhai chun hling thing lum a hriet hma khawmin: Ama chun thlivirin la hmang a ta, A hring le a kâng lai khawm.[12]

¹⁰Mi fel chun phubalâkna chu a hmuin lâwm a ta, Mi rilo thisena chun a ke chu sâwp a tih.

¹¹Chuongchun, mihaiin, “Mi fel ta ding chun lâwmman a lo um tak tak a; Hnuoia hin rorêltu Pathien a lo um tak tak a ni hi,” tîng an tih.