Read Hmar INPÂKNA HLA BU 59 Bible Online

INPÂKNA HLA BU 59 - Hmar bible

INPÂKNA HLA BU 59

¹Hla ṭhuoitu ta dingin: Altashhetha sak ding. David inpâkna hla: Miktam. Saulan mi a tir a. Ama that dinga an inchân laia mi. Aw Pathien, a mi dotuhaia inthawk hin mi sanhim la, A mi thawtuhaia inthawk hin hmun insângah mi dâwmkai rawh.

²Thil suksuoltuhai laia inthawkin mi sanhim la, Thisen insuo hmanghaia inthawkin mi sandam rawh.

³Aw LALPA, ka bawsietna lei ni lovin, ka suol lei khawm ni bawk lovin, Ngai ta, ka hringna hi an inchân zing si a, Mi hrâthai chu a mi thaw dingin an pungkhâwm a nih.

⁴Ka suol naw sa khawmin an tlân a, an inbuotsai a, Mi ṭhangpui dingin insukhar la, en rawh.

⁵Aw LALPA, sipaihairawi Pathien, Israelhai Pathien, Nangma ngei chu hnam tinrêng sir dingin tho la, Mi vervêk suoltakhai chu lunginsiet hrim hrim naw.

⁶Zântieng an hung nawk a, ui angin an khêk veng vung a, Khawpui chu an hêl an hêl a.

⁷Ngai ta, an bauah an inir suok a, An hmûra chun kâwlhnâmhai a um a: “Tu am hrie an um a?” an ti el a nih.

⁸Nisienlakhawm, aw LALPA, nangin anni chu nuisan lem i ta; Hnam tinrêng chu nuiêu i tih.

⁹Aw ka hrâtna, nghâk zing ka ti che. Pathien chu ka kulbîng insâng a ni si a.

¹⁰Ka chunga ngilnei Pathien chun mi tuok a ta, Pathienin ka hmêlmahai chunga ka duthusâm chu mîn hmutir a tih.

¹¹Anni chu that naw la, chuong naw chun, ka mihaiin theinghil rawi an tih; Aw LALPA, kan phaw tak, I thilthawtheinain sukdar la, suktlâwm rawh.

¹²An baua suolna lei le, an hmûra thu suok leiin, An chapona ngeia chun âwk raw se: An thu hril hlak, ṭawngseinphurna le khêlthu lei khawmin.

¹³Annirawi chu lunginsenin sukbohmang la, an um ta nawna dingin sukbohmang rawh, Pathienin Jakobrawi chungah ro a rêl ti hre tâwl raw hai seh, Leihnuoi tâwp chenin.

¹⁴Chun, zântieng hung nâwk hai sienla, ui angin khêk veng vung hai sien, Khawpui chu hêl hêl raw hai seh.

¹⁵Anni chu fâkding zawngin invâk an ta, An khawp naw chun zânkhawvârin um an tih.

¹⁶Nisienlakhawm, kei chun i hrâtna thu hi hlain sak ka ta, Anih, zîngkâr chun i ngilneina thu hi hlimtakin hlain sak ka tih: Nang chu ka kulbîng insâng, Ka lunginzîng nia kân humhimna i ni si hlak a.

¹⁷Aw ka hrâtna, nangma inpâkna hla sak ka tih. Pathien chu ka kulbîng insâng, ka chunga ngilnei Pathien chu a ni si a.