Read Hmar INPÂKNA HLA BU 6 Bible Online

INPÂKNA HLA BU 6 - Hmar bible

INPÂKNA HLA BU 6

¹Hla ṭhuoitu ta ding: ṭingṭang chi hran hrana Seminith le sak mi, David Inpâkna Hla. Aw LALPA, lunginsenin mi kâwk naw la, Lunginsenin mi thunun bawk naw rawh.

²Aw LALPA, mi lunginsiet la, ka chau zo ta si a; Aw LALPA, mi sukdam rawh, ka ruhai hi a na zo vawng ta si a.

³Ka hringna khawm a lunginzîng bêk bêk bawk a nih: Aw LALPA, nangin iengchen am i mi thlathlam ding a na?

⁴Aw LALPA hung kîr nâwk la, ka hringna sanhim la, I ngilneina leiin mi sandam la.

⁵Thi hnung chun nangma hriet zingna a um si naw a, Seola chun tuin am lâwmthu hril a ti che leh?

⁶Kân rûmnain ka châu tah, Zân tin ka zâlna chu tuiah ka suklâng a; Ka khum chu ka mitthliin ka sukhu hlak.

⁷Ka mit hi lungngaina leiin a hung se deu deu a, A mi dotuhai leiin a hung tar deu deu tah.

⁸Nangni thil suol thawtuhai po po, mi mâksan vawng ro. LALPA chun ka ṭap ri chu a hriet ta si a.

⁹LALPA chun ka hnina chu a hriet ta si a, LALPA chun ka ṭawngṭâina chu pawm a tih.

¹⁰A mi dotuhai po po chu muolphoin lunginzîng bêk bêk an ta, Kîr nâwk an ta, kâr lovin la muolpho thut an tih.