Read Hmar INPÂKNA HLA BU 64 Bible Online

INPÂKNA HLA BU 64 - Hmar bible

INPÂKNA HLA BU 64

¹Hla ṭhuoitu ta dingin: David Inpâkna Hla. Aw Pathien, ka lungzîngna thua hin ka râwl hi lo ngai la, A mi dotuhai ṭitumnaa inthawk hin ka hringna hi humhim rawh.

²Thil ṭha naw thawtuhai inrâwn rûknaa inthawk chun mi thuphmang la, Thil suksuoltuhai inhâwrkhâwmhaia inthawk chun:

³Chuonghai chun kâwlhnâm angin an lei an tâtngei a, An thal, thu khahai chun an tin hlak;

⁴Mi demkailo chu hmun fienriela an kâp theina dingin; Ṭi lovin, kârlovin an kâp thut hlak.

⁵Thil suol thaw ding chun an infui tuoh a, Châng, arûka kam thua dâm an inbiek hlak a, “Tuin am chuong chu hmûng an ta?” an ti a.

⁶Rîtlona an zawng suok hlak a, “Ṭhahnemngaitakin kan zawng zo tah,” an ti hlak a. An sûngtieng ngaituona le lungril chu inthûktak a ni seng nghâl a.

⁷Nisienlakhawm, Pathien chun anni kâp a ta, Kârlova thala inhliemin um an tih.

⁸Chuongchun, anni lei ngei chun anni a do leiin, sukkatin um an ta, Anni hmu taphawthai chun an lu thinkhum an tih.

⁹Chuongchun, mi po poin ṭîng an ta, Pathien sinthaw chu hril an tih; A thilthaw khawm chu vartakin ngaituong an tih.

¹⁰Mi felhai chu LALPAAH lâwm an ta, amaa chun ringna innghat an ta, Lungril indiktak put po pohai chun suong an tih.