Read Hmar INPÂKNA HLA BU 66 Bible Online

INPÂKNA HLA BU 66 - Hmar bible

INPÂKNA HLA BU 66

¹Hla ṭhuoitu ta dingin: Hla, Inpâkna Hla Leihnuoi po pohai, Pathien chawimawiin hlimtakin khêk unla,

²A hming ropuizie chu hlain sak suok ro: Ama inpâkna chu sukropui ro.

³Pathien kuomah, “I thilthawhai chu a va ropui de! I thilthawtheina nasatzie leiin nangma dotuhai chu i kuomah intuklût an tih.

⁴Leihnuoi po pohai hin chibai bûk an ti che a, Nangma inpâkin hla sak an ta, I hming inpâkin hla sak an tih,” ti ro.

⁵Hung ta u, Pathien thilthawhai hi en ta u, Mihriem nauhai chunga a thilthawa hin ṭi a um a nih.

⁶Ama chun tuipui kha hnuoi ṭâwlah ân changtir a, Vadungpui kha kein an fe kâi a[16]; Chutaka chun amaah ei hlim a.

⁷A thilthawtheina chun kumkhuoin ro a rêl a, A mitin hnam tin a en hlak: Hel hmanghai chu anni le anni inchawimawi naw raw hai se.

⁸Aw mi tinhai, ei Pathien chu inpâk unla, Ama inpâkna ri chu inhriettir ro:

⁹Ama chun ei hringna hi a sukhring zing a, Ei kehai hi suktâwl a phal nawh.

¹⁰Aw Pathien, nangin i mi fie a, Tangkaruo fiea a um angin, keini i mi fie a.

¹¹Nangin lênah i mi ṭhuoi lût a, Kan kâwnga hin phur riktak chu în nghat a.

¹²Mihai tawlailîr chunga chuongin, kan lu chungah în fetir a, Mei le tui kan fe thleng a, Nisienlakhawm, hmun chênghnâwngtaka lût dingin i mi ṭhuoi suok a;

¹³Pumrawhmanga thil inhlânhai leh i inah lût ka ta, Ka thutiemhai chu i kuomah hlen ka tih.

¹⁴Ka hmûrin a hril a, Lunginzînga ka um laia ka bauin a hrilhai chu.

¹⁵Sa thâutak pumrawhmanga thil inhlânhai i kuomah inhlân ka ta, Berâmchalhai raw rim inhnik leh; Bâwngchalhai, kêlhai leh inhlân ka tih.

¹⁶Hung ta u, Pathien ṭituhai po po, ngai ta u, Chuongchun, ka hringna dinga a thilthaw chu inhriettir ka ti cheu.

¹⁷Ama chu ka bauin ka ko a, Ka leia chawimawiin a um a.

¹⁸Ka lungrila suolna ka ngaisak chun, LALPA chun mi ngaisak naw nih.

¹⁹Nisienlakhawm, Pathien chun a mi lo ngai a, Ka ṭawngṭâina ri chu a lo bengkhawn a nih.

²⁰Ka ṭawngṭâina min hlawsamtir lova, A ngilneina lakieng ngailo, Pathien chu inpâkin um raw se.