Read Hmar INPÂKNA HLA BU 69 Bible Online

INPÂKNA HLA BU 69 - Hmar bible

INPÂKNA HLA BU 69

¹Hla ṭhuoitu ta dingin: Sosanima sak ding. David Inpâkna Hla. Aw Pathien, mi sandam rawh, Tuihai chu ka rînga chen hin a lût ta si a.

²Chirhak inthûktak, sirsan hrim hrim um nawnaah ka tlum duok duok hi, Tui inthûktak, tui lien a mi chîm tlumnaahai, ka lo lût ta hi.

³Ka khêkna leiin ka chau a, ka dang a ṭâwl zo ta a: Ka Pathien ka nghâknaa hin ka mit ân vai zo ta a.

⁴A san boa a mi theidatuhai chu ka samzai nêkin an tam lem a, Indiknawtaka mi doa, mi sukbohmang tumtuhai chu mi hrâttak an nih, Kân rûk dêr naw khawm an min rultir a.

⁵Aw Pathien, nang chun kân vêtzie hi i hriet a, Ka thiemnawnahai khawm hi i kuoma chun thup a ni nawh.

⁶Aw LALPA, sipaihai Pathien, nangma nghâktuhai chu keia leiin muolpho naw hai sienla, Aw Israelhai Pathien, nangma zawngtuhai che chu keima leiin sukzakin um naw raw hai se.

⁷Nangma leia hrilsiet ka tuor leiin. Inzaknain ka hmai ân khum zo tah.

⁸Ka unauhai laia chun mikhuol ka hung ni ta a, Ka nu nauhai kuoma chun hriet ngailo mi ka lo ni ta a.

⁹I ina ka ṭhahnemngainain a mi fâk zo a, Nangma hrilsetuhai hrilsietnahai chu ka chungah a tla zo tah.

¹⁰Ka ṭap a, bu nghei puma ka hringna ka thunun leh, Chu chu an mi hrilsietna a hung ni pei a.

¹¹Ka silfêna saiip ka hmang leh, An ta dingin a se tienga hrilkhina ka hung ni pei a.

¹²Kul kawtkhâra ṭhunghai chun ka chungchâng thu an hril a, Zu inrui hmanghai hla ka ni hi.

¹³Nisienlakhawm, aw LALPA, kei chun chu hun lâwmumah, i kuomah a nih ka ṭawngṭâi chu; Aw Pathien, i ngilneina nasatak leiin, I sandamna thutak chun mi hung dawn rawh.

¹⁴Chirhaka inthawk hin mi sanhim la, mîn tlumtir lul naw rawh. A mi theidatuhaia inthawk le, tui inthûktaka inthawk hi sanhimin mîn umtir rawh.

¹⁵Tui lienin mi chîm tlum naw sienla, Tui inthûktak hin mi lem bawk naw raw se; Khursûng khawmin a bau mîn chîpnel naw raw se.

¹⁶Aw LALPA, mi hung dawn la, i ngilneina chu a ṭha si a, I lainatna nasat ang peiin keia tieng hi hung ngha la.

¹⁷I siehlaw kuoma hin i hmai khawm thup naw la, Ka lunginzîng si a mi hung dawn vak rawh.

¹⁸Ka hringna hi hung hnaiin intlan la, A mi dotuhai lei hin nangin mi sanhim rawh.

¹⁹Nangin mi mi hrilsietna dâm, ka muolphona dâm, kân zakna dâm, hi i hriet a. A mi dotuhai chu i hmaah an um vawng a nih.

²⁰Mi mi hrilsietna hin lungriemin a mi thlâk a, nasatakin ka lungngai bawk a, Chuongchun, a mi lunginsiettu ding ka zawng a; nisienlakhawm, tukhawm an um si nawh; A mi thlamuontu dinghai ka zawng a; nisienlakhawm, tukhawm ka hmu si nawh.

²¹Ka bu dingin thil kha an mi pêk nâwk nghâl a, Ka dang a châr hlakin uoin thûr dâwn dingin an mi pêk a,

²²An hmaa an dawkân chu châng lo ni sienla, Lungmuongtaka an um laiin bil lo ni raw se.

²³An mithai chu an hmu theinawna dingin sukthimin hung um sienla, An kâwnghai chu sukthin rawp rawh.

²⁴I lungninawna nasatak chu an chungah bunthla la, I lunginsen ṭiumna chun anni chu man raw se.

²⁵An umna chu hung ṭâwp sienla, An puon inahai chun tukhawm um naw raw se.

²⁶I ivuok chu an suknawmna a, I înhliemhai lungngaizie chu an hril si hlak a.

²⁷An rîtlona chu rîtlonain belsa la, Anni chu i felnaa chun lût naw raw se.

²⁸Anni chu hringna bua inthawk chun thaihmangin um hai sienla, Mi felhai laia chun ziek ni ve naw raw hai se.

²⁹Nisienlakhawm, kei chu rimsitak le lungngaitak ka na, Aw Pathien, i sandamna chun hmun insângah mi sie raw se.

³⁰Pathien hming chu hlain inpâk ka ta, Lâwmthu hrilin ama chu chawimawi ka tih.

³¹Chuong ang chun, bâwngchal amanih, ki le tin nei bâwngchal nêk chun, LALPA suklâwm lem a tih.

³²Mi rimsihai chun chu chu an hmu a an lâwm a, Nangni Pathien zawngtuhai, in lungril chu hringin um raw se.

³³LALPAIN pasiehai chu a bengkhawn a, A mi intânghai chu a hmusit si naw a.

³⁴Hnuoi le vân chun ama chu inpâk raw se; Tuisuoriet le an sûnga thil châng thei taphawthai leh.

³⁵Pathienin Zion chu sansuokin, Juda khuohai chu a siem ding a ni si a, Chuongchun, chutaka chun um an ta, nei nghâl an tih.

³⁶A siehlawhai thlahai khawm chun hluosâwng an ta, A hming ngainatuhai chu a sûngah um an tih.