Read Hmar INPÂKNA HLA BU 7 Bible Online

INPÂKNA HLA BU 7 - Hmar bible

INPÂKNA HLA BU 7

¹David Siggaion Hla, Benjamin mi Kusa thuhril chungchâng thua ama bawkin LALPA chawimawia a sak chu. Aw LALPA ka Pathien, nangmaa chun ka ringna kân nghat a, A mi hnawttuhai po poa inthawk hin mi sandamin, mi humhim rawh.

²Chuong naw chun, sanhimtu um lovin, sakeibaknei angin, Ka hringna hi keinawiin, sawisa rawi an tih.

³Aw LALPA ka Pathien, hi hi thaw ka lo ni a, Ka kutah suolna um a lo ni a

⁴Kei le inremtaka um chu suola thung ka lo ni chun, (Anih, san nei lova a mi dotuhai hi ka sanhim a ni lem a nih)

⁵Hmêlma chun ka hringna chu hnawtin, hnawt phâk el raw se; Anih, ka hringna hi hnuoia chun chîlthluin, Ka ropuina hi pilvut lai sie el raw se.

⁶Aw LALPA, lunginsenin tho la, A mi dotuhai lunginsenna doin inthawk la, Ka ta dingin insukhar la, rorêlna ding thu i pêk ta si a.

⁷Chuongchun, mi tin inkhâwmhai chun inhuol vêl hai sienla che. Chun, nang chu an chungah chungtieng chun kîr nâwk rawh.

⁸LALPA chun mi tin chungah ro a rêl hlak; Aw LALPA, keimaa felna le, ka lungrila ṭhatna um ang peiin ro mi rêlpêk la;

⁹Aw mi rilohai rîtlona chu hung tâwp ta sienla, mi felhai ruok chu sukdet rawh. Pathien feltak chun lungrilhai le lungvarhai chu a fie hlak si a.

¹⁰Ka phaw chu Pathien kuomah a um a; Ama chu lungril indiktak put sandamtu a nih.

¹¹Pathien chu rorêltu feltak a na, Anih, ni tina mi suolhai chunga lungninawna nei hlak Pathien a nih.

¹²Mi chu a nghakîr naw chun ama chun a kâwlhnâm tâtngei a ta, A thalngul chu a kuoi a, a siemrêl ta a.

¹³Thina hriemhreihai chu ama thatna dingin a siem diem ta bawk a; A thalhai chu chawk theiin a siem a.

¹⁴En ta, suolna hasein a um a, Anih, thil suksuolna a vawn a, khêlthu a nei ta a.

¹⁵Khur a siem a, inthûktakin a cho a, Ama khur siema chun a tla ta a.

¹⁶A thil suksuolna chu ama lu chung ngeia chun hung kîr nâwk a ta, Nunsetaka a thilthaw chu ama lusîpa ngei hung tlâng a tih.

¹⁷LALPA chu a felna lei hin a kuomah lâwmthu hril ka ta, LALPA Achunghnungtak hming inpâkin sak bawk ka tih.