Read Hmar INPÂKNA HLA BU 71 Bible Online

INPÂKNA HLA BU 71 - Hmar bible

INPÂKNA HLA BU 71

¹Aw LALPA nangmaa chun ka ringna kân nghat hlak a, Iengtika khawm muolphoin mîn umtir naw rawh.

²I felna leiin mi sanhimin, mi sansuok la, Keia tieng hin i na hung sit la, mi sandam rawh.

³Keia ta dingin umna lungpui, ka fe thei rawpna ding, hung ni la, Nangin kei mi sandam dingin thu i pêk a, Ka lungpui le ka kulpui i ni si a.

⁴Aw ka Pathien, mi rilo kuta inthawkin mi sansuok la, Mi fel naw le nunsetak kuta inthawk chu.

⁵Aw LALPA Pathien, nang chu ka ibeisei chu i na, Ka naupangtea inthawka ka iring chu i nih.

⁶Ka nu phîngsûnga inthawk hrimin nangma keihruoiin ka um hlak a, Ka nu phînga inthawka mi la suoktu i nih; Nang i nih kân pâk rawp ding che chu.

⁷Mi tamtak ngaiin thilmak ang ka na, Nisienlakhawm, nang chu kân humhimna dettak i nih.

⁸Ka bau hi nangma inpâknain sip a ta, Sûnnithlâkin nangma chawimawinain sip bawk a tih.

⁹Ka tar pha leh mi pei thla naw la, Ka tha a ṭhum pha leh mi mâksan bawk naw rawh.

¹⁰A mi dotuhai chun ka chungchâng thu an hril si a, Ka hringna inchântuhai chu an inrâwn bawk a,

¹¹“Pathienin a mâksan tah: Hnawt unla, man ro; sanhimtu ding hrim an um si nawh,” tiin.

¹²Aw Pathien, mîn hlat lul naw la, Aw ka Pathien, mi ṭhangpui dingin inhmaw rawh.

¹³Ka hringna dotuhai chu muolpho le bohmangin um sienla, Ka sietna ding zawngtuhai chu hrilsietna le inzakna inkhumin um raw se.

¹⁴Nisienlakhawm, kei chun chu beisei rawp ka ta, Inpâk zuol deu deu ka ti che.

¹⁵Ka bau hin i felna thu hril a ta, Sûnnithlâkin i sandamna thu hril bawk a ta, A tam chin ka hriet si naw a.

¹⁶LALPA PATHIEN thilthaw ropuitakhai leh hung ka ta, I felna, nanga felna thu chau hril ka tih.

¹⁷Aw Pathien, ka naupangtea inthawk nangin i mîn chûktir a, Tu chen hin i thilmak thawhai chu kân hriettir hlak.

¹⁸Anih, aw Pathien, ka hung tar a, ka lu a hung inṭuok pha khawm mi mâksan lul naw la, I hrâtna hi ruolthar nâwkhai kuoma le I thilthawtheina hi la hung um dinghai taphawt kuoma kân hriettir hmakhat chu.

¹⁹Aw Pathien, i felna khawm ân sâng êm êm a nih, Aw Pathien, nang thil ropuitakhai thawtu, Nangma ang hi tu am an um a?;

²⁰Nang, lungzîngna tamtak le nasatak mîn hmutirtu chun, Mi sukhring nâwk i ta, hnuoi inthûktaka inthawkin mi ṭhuoisuok nâwk i tih.

²¹Nangin ka ropuina mi sukpungpêk la, Hung ngha nâwkin mi thlamuon rawh.

²²Perkhuongin inpâk bawk ka che a, Aw ka Pathien, i thutak ngei chu inpâk ka tih. Aw nang Israelhai Mi Inthieng, Ṭingṭang leh nangma inpâkin hla sak ka tih.

²³Nangma inpâka hla ka sak pha chun ka hmûr hi hlim êm êm a ta, Ka hringna i întlan khawm hi hlim êm êm a tih.

²⁴Ka lei khawm hin sûnnithlâk i felna thu hril a ta, Ka sietna ding zawngtuhai chu an muolphoin an inzak ta si a.