Read Hmar INPÂKNA HLA BU 73 Bible Online

INPÂKNA HLA BU 73 - Hmar bible

INPÂKNA HLA BU 73

¹(73—89) Asaph inpâkna hla. Pathien chu Israelhai chungah a lo ṭha ngei a, Lungrila inthienghai chunga chun.

²Nisienlakhawm, kei chun chu ka sirpel vâng vâng a, Ka ke pênhai hi ân tlêu vâng vâng a nih.

³Mi rilohai vângneizie ka hmuin, Mi uonghai chu kân hnar si a.

⁴An thi lai chun tuorna hrim an nei naw a, An hrâtna chu a det lem hman hman a.

⁵Mi dang anga rinumin an um naw a, Mi dang sawisakin an um bawk nawh.

⁶Chuleiin, chapona chun khaidiet angin an rîng a zem a, Nunsietna chun silfên angin a tuom a.

⁷Thâu leiin an mit a pâwng a, Lungrila duthusam nêka nasa an nei a.

⁸An innuisan a, suoltakin nêksâwrna thu an hril a; Chapotakin an ṭawng hlak.

⁹An bau chu vânahai khin an sie a, An lei chun hnuoi hi a fang thleng hlak.

¹⁰Chuleiin, a mihai chu chutaka chun an kîr nâwk a, Tui noa sip chu anni idâwn fai rêtin a um a.

¹¹“Pathienin iengtin am hrieng a ta? Achunghnungtak chun hrietna a nei ding am a nih?” an ti a.

¹²En ta, hienghai hi mi rilohai an ni hi, Inhawitirtaka umin an hausa deu deu hlak.

¹³A thlâwn elin a nih, ka lungril hi ka sukfai a, Ka kuthai demkailonaa ka sâwp chu.

¹⁴Sûnnithlâkin sawisakin ka um a, Tûk tin kâwkin ka um si a.

¹⁵“Chuong ang chun hril ka tih,” lo ti ta inla, Ngai ta, i nauhai thlahai chunga vervêktaka lo thaw nîng ka tih.

¹⁶Chu chu ka hriet theina ding zie ka ngaituo chun, Ka ta dingin a na taluo a nih.

¹⁷Pathien hmun inthienga ka lût a, An tâwpna ding ka ngaituo hma chun.

¹⁸Anni chu hmun innâltakahai i sie ngei a, Sietnaahai i pei thlâk hlak.

¹⁹Iengtiziea mitkhapkâr chaua an rêm el am a ni aw! Thil râpthlâktakhaia sukbohmang daiin an um ta a ni hi.

²⁰Miin meng hnunga mang an ngainêp angin, Aw LALPA, i har pha chun anni hlimthla chu ngainêp i tih.

²¹Ka lungril hi a lungngai a, Ka lungrila khawm sûn angin ka um si a.

²²Mi mâwl le iengkhawm hre lo ka na, I kuoma chun sa ang el ka ni hiel hlak kha.

²³Nisienlakhawm, i kuomah ka um rawp a, Ka kut changtieng hi i lo chel hlak.

²⁴Nangin i remruotnain mi ṭhuoi i ta, Chu hnunga chun ropuinaa khin mi lâwm i tih.

²⁵Vâna khin nang naw chu tu am ka nei a? Hnuoia khawm hin nang naw chu ka dit tukhawm an um nawh.

²⁶Ka taksa le ka lungril hi a chau ta a, Nisienlakhawm, Pathien chu kumkhuoa ka lungril hrâtna ding le ka chanvo a nih.

²⁷Ngai ta, nangma hlata umhai chu an bohmang ding a ni si a, A uiret santu taphawt che chu i sukbohmang ta a.

²⁸Keia ta ding chun Pathien hnai hi a ṭha a nih; LALPA Pathien chu kân humhimna dingin ka hmang a, I sinthaw po po thu ka hril theina dingin.