Read Hmar INPÂKNA HLA BU 74 Bible Online

INPÂKNA HLA BU 74 - Hmar bible

INPÂKNA HLA BU 74

¹Asaph Maskil Aw Pathien Iengdinga kumkhuoa i mi thlauthlâk am a na? Iengdinga i ran tlatna hmuna berâmhai chunga hin i lungsen a khûk am a na?

²I mihai inkhâwmhai, inhmaa i închâwk, Hnam i ro dinga i întlan kha, hre zing rawh; I umna hlak Zion tlâng leh.

³Kumkhaw rêmna tieng chun i ke khai la, Dotuhaiin hmun inthienga chun thil suol tinrêng an thaw ta hi.

⁴Nangma dotuhai chu i mihai inkhâwmhai laia chun an hawhaw dur dur a, An inchiknahai chu inchikna dingin an khai ta a.

⁵Mi, rampui thing, Hreipuia tinhai angin an inlang a.

⁶Tuhin chu a thil kermawihai po po chu, Hreite le tubauhaiin an suksiet zo ta a.

⁷I hmun inthieng chu an raw a, I hming umna khawm chu leihnuoi ichîm khawp hielin an sukkhawhlo ta a.

⁸An lungrila chun, “Sukse vawng tâwl ei tiu,” an ti a, Hi rama Pathien inkhâwmna in po po hi an raw siet zo tah.

⁹Kan inchiknahai chu kan hmu ta naw a, Zâwlnei hrim hrim an um ta naw a, A sâwt dingzie hre hrim hrim khawm keini lai an um nawh.

¹⁰Aw Pathien, dotu chun ieng chen am a hrilsiet ding che? Hmêlma chun kumkhuoin i hming hi a hrilsiet ding am a nih?

¹¹Iengdinga i kut, i kut changtieng kha i lâk kîr am a na? Kei dawk nâwk la, anni chu sukbohmang rawh.

¹²Nisienlakhawm, Pathien chu inhma chena ka Lal a nih, Hnuoi laitaka sandamna siemhlaktu chu.

¹³Nang chun i hrâtnain tuipui kha i sukṭhe a, Nang chun tuia dragonhai luhai chu i sukkawi a.

¹⁴Nang chun Leviathan luhai chu i suknâwi a, Ama chu thlalêra umhai kuoma chun bu dingin i pêk a,

¹⁵Nang chun tuihnâr le tuilien chu în ṭhe huk a, Nang chun vadung lientak takhai chu i sukkang a.

¹⁶Sûn hi i ta a na, zân khawm i ta a nih; Nangin êntu le nisa khi i buotsai a.

¹⁷Nangin leihnuoi ramrihai po po chu i khang vawng a, Nangin nipui le thlasik hi i siem a.

¹⁸Aw LALPA, hi hi hre zing rawh, dotu chun a hrilsiet che a. Hnam invêttak chun i hming an hrilsiet kha.

¹⁹Aw, i vaṭhu hringna hi ram sahrâng kuoma chun pe lul naw la, I mi rimsihai hringna hi kumkhuo chun theinghil lul naw rawh.

²⁰Thuthlung kha hung pawisa la, Hnuoi hmun inthim lai chu nunsietnain a sip si a.

²¹Aw, nêksâwrna tuortuhai chu muolphoin kîr naw sienla, Rimsi le pasiehai chun i hming inpâk raw se.

²²Aw Pathien, tho la, nangma thu chu nangin inhril fâwm la, Mi invêt chun sûnnithlâkin a hrilsietzie che chu hre zing rawh.

²³Nangma dotuhai ri chu theinghil naw la, Nangma dotuhai ri so insâng zuol pei chu.