Read Hmar INPÂKNA HLA BU 77 Bible Online

INPÂKNA HLA BU 77 - Hmar bible

INPÂKNA HLA BU 77

¹Hla ṭhuoitu ta dingin: Jeduthun dânin. Asaph Inpâkna Hla. Ka râwlin Pathien chu ko ka ta, Ka râwlin Pathien ngei chu ko ka ta, ama chun keia tieng na lo sit a tih.

²Ka lunginzing ni chun LALPA ka zawng a; Ka kut hi zâna khawm la thla lovin ka phar zing a, Ka hringna hin thlamuon a nuom nawh.

³Pathien ka hriet zing a, ka buoi hlak; Ka ngaituo a, ka thlarau hi a châu hlak.

⁴Ka mithai hi i chel meng zing hlak a, Ṭawng theilo khawp rauvin ka lunginzing hlak.

⁵Tienlai nihai ka ngaituo a, Tienlai kumhai chu.

⁶Zâna ka hla sak chu ka hriet thar nâwk a, Ka lungrilah kân ngaituo hlak; Ka thlarau khawmin ṭhahnemngaitakin a zawng a.

⁷LALPA chun kumkhuoin a thlauthlâk ding am a ni aw? Iengtika khawm a lâwm naw ding am a ni aw?

⁸A ngilneina chu a bo sawng kumkhuo ding am a ni aw? A thutiem chu suon po po chenin a bo ding am a ni aw?

⁹Pathien chun lunginsiet a theinghil am a ni aw? Lungsenin a lainatnahai chu a khâr ta am a ni aw?

¹⁰Chun, “Chu chu ka hrât nawna lei a nih; Nisienlakhawm, Achunghnungtak kut changtieng kumhai kha hre zing ka tih.

¹¹ LALPA thilthaw thuhai kha hril ka ta, Tienlaia i thilmak thawhai kha hre zing ka tih.

¹²I sinthaw po po kha ngaituo bawk ka ta, I thilthawhai khawm kha sût ka tih,” ka ti a.

¹³Aw Pathien, i lampui chu hmun inthiengah a um a, Pathien ang hi pathien ropui tu am an um a?

¹⁴Nang chu thilmak thaw hlaktu Pathien chu i na, Mi tin laiahai chun i hrâtzie în hriettir hlak.

¹⁵I bânin i mihai i sansuok a, Jakob le Josef nauhai chu.

¹⁶Aw Pathien, tuihai chun an hmu che a, Tuihai chun an hmu che a, an ṭi a, Tui inthûktakhai chu an inthin bawk a.

¹⁷Sûmhai khin tui an bunthlâk a, Vânhai khin râwl an insuo a, I thalhai khawm ân lep zak zak a,

¹⁸I vâninrûm ri chu thlivirah a um a, Kâwlinlephai chun khawvêl hi a el zawt zawt a; Hnuoi hi inthinin ân hnîng dur dur a.

¹⁹I lampui chu tuipuiah a um a, I lampuihai chu tui lientakah a um a; I kehnunghai khawm hriet a ni nawh.

²⁰Mosie le Aron kutin, I mihai chu berâm ruol angin i ṭhuoi hlak.