Read Hmar INPÂKNA HLA BU 79 Bible Online

INPÂKNA HLA BU 79 - Hmar bible

INPÂKNA HLA BU 79

¹Asaph Inpâkna Hla Aw Pathien, hnam tin i rochana hin an lût a, I biekin inthieng hi an sukpawrche a, Jerusalem hi an sukchim rem rum a.

²I siehlawhai ruok chu chunga vatêhai buah an pêk a, I mi inthienghai sa chu ram sahai kuomah an pêk a.

³An thisen chu Jerusalem vêla hin tui angin an bunthlâk a, Anni phûmtu ding hlak tukhawm an um si nawh,

⁴Kan vêla mihai hrilsietin kan lo um a, Kan dep vêla mihai hmusit le nuisanin kan lo um a,

⁵Aw LALPA, ieng chen am i lunginsen kumkhuo ding a na? I thîkna chu mei angin a chawk ding am a nih?

⁶Nangma hre naw hnam tin chunga hin i lunginsenna chu bunthla la, I hming lam naw ramhai[18] chunga khawm chun.

⁷Jakobhai chu an fâk zo a, An umna chu an suk ram ta si a.

⁸Kan thlatuhai rîtlona kha keini kuoma hin chu hre zing ta naw la, I lainatnahai chun mi hung tuok vak sienla; Nasataka sukhnuoiin kan um ta si a.

⁹Aw Pathien a mi sandamtu, i hming ropuina dingin mi ṭhangpui la, I hming leiin mi sanhim la, kan suolhai hi hung sâwp fai rawh.

¹⁰Hnam tinin, “Khâwlai am an Pathien kha teh?” an ti el dîm a nih? I siehlawhai thisen suok phubalâkna chu, Kan mithmuah hnam tin lai hin hriet ni raw se.

¹¹Mi intâng inrûm ri chu i hmaah tlung sienla, I thilthawtheina nasatzie ang peiin thi dinga ruothai chu humhim rawh.

¹²Aw LALPA, nangma an hrilsietna che kha, Kan vêla mihai kuomah an ângsûngah a lêt sariin thung nâwk rawh;

¹³Chuongchun, keini i mihai, i ran tlatna hmuna berâmhai hin, Kumkhawtluongin lâwmthu hril kan ti che a, Suon po po chenin nangma inpâkna chu inhriettir pei kan tih.