Read Hmar INPÂKNA HLA BU 84 Bible Online

INPÂKNA HLA BU 84 - Hmar bible

INPÂKNA HLA BU 84

¹Hla ṭhuoitu ta dingin; Gittitha sak ding. Kora naupahai Inpâkna Hla. Aw sipaihai LALPA, I umnahai chu dit a va um de!

²Ka hringna hin LALPA biekin inhuonna sûng tuollai chu a ngai êm êm a, anih, a chau pha hiel a. Ka lungril le ka taksa hi Pathien hring kuoma chun hlimin a khêk suok a.

³Anih, chawngzawngin in a hmu a, Pelêuvin a ta dingin bu a hmu bawk a, a te siena dingin; Aw sipaihai LALPA, ka Lal le ka Pathien, Chu chu i maichâmhai ngei chu a nih.

⁴I ina umhai chu an hamṭha a, Nang chu inpâk rawp an ti che.

⁵Nangmaa hrâtna nei mi chu a hamṭha, A lungrila Zion panna lamlienhai umna chu.

⁶Ṭapna ruom chu an hraw laiin tuihnâr umnahaiah an siem hlak a, Anih, ruotui tla hmasa chun malsâwmnain ân khum hlak.

⁷Hrâtnaa inthawkin, hrât nâwk zuolnaah an fe hlak a, Ziona Pathien hmaa chun an inlang seng hlak.

⁸Aw LALPA, sipaihai Pathien, ka ṭawngṭaina hi mi lo ngaipêk la, Aw Jakob Pathien, na lo sit rawh.

⁹Aw Pathien, kan phaw tak, en ta, I hrieknâl pa hmêl hi en ta.

¹⁰I biekin inhuon sûng tuollaia ni khat um hi ni sâng khat nêkin a ṭhalem sih a; Rîtlona puon inhaia um nêk chun, Ei Pathien ina kawtkhâr vêngtu ni khawm ka nuom lem a nih.

¹¹LALPA Pathien chu nisa le phaw a ni si a, LALPA chun lunginsietna le ropuina pêng a ta, Indiktaka umhai kuoma chun thil ṭha hrim hrim inro naw ni.

¹²Aw sipaihai LALPA, Nangma ring mi chu a hamṭha ie.