Read Hmar INPÂKNA HLA BU 85 Bible Online

INPÂKNA HLA BU 85 - Hmar bible

INPÂKNA HLA BU 85

¹Hla ṭhuoitu ta dingin: Kora naupasalhai Inpâkna Hla LALPA i ram chunga hin i lâwm a, Jakobrawi sala an um chu i ṭhuoi kîr nâwk a.

²I mihai rîtlona i ngaidam a, An suolna po po chu în khum zo tah.

³I lunginsenna po po chu i lâk hmang a, I lunginsenna nasatak chu i nghatsan ta a.

⁴Aw, a mi sandamtu Pathien, mîn nghatkîrtir la, Kan chungah i lunginsenna chu sukbo rawh.

⁵Kan chungah i lunginsen kumkhuo ding am a nih? I lunginsen chu suon po po chenin în langtir pei ding am a nih?

⁶Nangmaa chun i mihai an hlim theina dingin, I mi sukhar nâwk naw ding am a nih?

⁷Aw LALPA, i zainêmna chu mîn hmutir la, I sandamna chu mi pe bawk la,

⁸Pathien LALPA thu hril ding chu ngai ka ta, A mihai le a mi inthienghai kuomah lungmuongna thu a hril ding a ni si a; Nisienlakhawm, anni chu invêtna tieng ngha nâwk ta naw raw hai se.

⁹A sandamna chu ama ṭituhai hnaia chun a um ngei ngei hlak a nih; Ei rama hin ropuina a um theina dingin.

¹⁰Ngilneina le thutak ân tuok a, Felna le remna an infâwp a.

¹¹Thutak chu hnuoia inthawkin ân der suok a, Felna chun vâna inthawkin a hung en thla ta a.

¹²Anih, LALPA chun thil ṭha pêng a ta, Ei ram hin a thilkak chu pe bawk a tih.

¹³Felna chun hma ṭhuoi a ta, A kehnunghai chu felna dinga lampuiah siem a tih.