Read Hmar INPÂKNA HLA BU 86 Bible Online

INPÂKNA HLA BU 86 - Hmar bible

INPÂKNA HLA BU 86

¹David ṭawngṭâina Aw LALPA keia tieng hin i na hung sit la, mi hung dawn rawh, Rimsi le pasetak ka ni hi.

²Ka hringna hi vawngṭha la, Pathien ngaisak mi ka ni si a, Aw, nang ka Pathien, nangma ringtu i siehlaw hi, sandam rawh.

³Aw LALPA, mi lunginsiet la, Sûnnithlâkin ka ko hlak si che a,

⁴I siehlaw hringna hi sukhlim la, Aw LALPA, ka lungril hi i kuomah ka sie tlat hlak si a.

⁵LALPA, nang chu i ṭha a, ngaidam i pei a, A kotuhai che phawt kuomah zainêmna i hau si a.

⁶Aw LALPA, ka ṭawngṭainaa hin na lo sit la, Lunginsiet ka hnina râwl hi lo ngai rawh.

⁷Ka lunginzîng ni chun ko ka ti che a, Nangin i mi dawn ding a ni si a.

⁸Aw LALPA, pathienhai lai chun nang ang hrim hrim an um naw a, I thilthawhai ang hi thilthaw hrim hrim a um bawk nawh.

⁹Aw LALPA, i siem hnam tinrênghai chu hung an ta, i hmaah hung kûn an ta, I hming chu hung chawimawi an tih.

¹⁰Nang chu i ropui a, thilmakhai i thaw bawk hlak si a, Nangma chau hi Pathien i nih.

¹¹Aw LALPA, i lampui chu mîn chûktir la, i thutaka chun um ka tih, I hming ṭi dingin lungril sakhat mîn puttir rawh.

¹²Aw LALPA ka Pathien, ka lungril po poin inpâk ka ti che a, I hming hi kumkhuoin chawimawi ka tih.

¹³Ka chunga i ngilneina chu a nasain; Ka hringna hi khursûng hnuoihnungtaka inthawkin i sanhim si a.

¹⁴Aw Pathien, mi chapohai chun an mi thaw a, Mi nunse um khâwmhai chun ka hringna hi sukbo tumin an zawng a, Nang chu an hmaah an sie ngai naw che.

¹⁵Nisienlakhawm, aw LALPA, nang chu Pathien, lainatnaa sip, mi lunginsietthei, Lunginuoi, zainêm le thutak hau i nih.

¹⁶Aw keia tieng hung ngha la, mi lunginsiet rawh. I siehlaw kuoma hin i hrâtna pe la, I suoknu nau hi sandam rawh.

¹⁷Ṭhatna ding inchikna mîn entir la, A mi theidatuhai chun chu chu an hmu a an muolphona dingin; LALPA nangin i mi ṭhangpuia i mi thlamuon leiin.