Read Hmar INPÂKNA HLA BU 88 Bible Online

INPÂKNA HLA BU 88 - Hmar bible

INPÂKNA HLA BU 88

¹Hla, Kora naupahai Inpâkna Hla: Hla ṭhuoitu ta dingin; Mahalath-Leannotha sak ding. Ezrah mi Heman Maskil Aw LALPA, a mi sandamtu Pathien, A sûn a zânin i hmaah ka khêk hlak a:

²Ka ṭawngṭaina hi i hmaah lût sienla, Ka khêkriah i na hung sit rawh.

³Ka hringna hi lunginzîngnahaiin a sip a, Ka hringna hin Seol chu a hung hnai ta si a.

⁴Khursûnga zu fehai laia tiemsa ka na, Hrâtna hrim hrim neilo mi ang ka nih.

⁵Râl thathai thlâna zâlhai anga, Mithi laia pei thlâk ka nih, Chuonghai chu i hriet ta nawh, I kuta inthawka sukbohmang an nih.

⁶Khursûng hnuoihnungtakah i mîn zâltir ta a. Hmun inthimtak, inthûktakahai chun.

⁷I lunginsenna chun a mi del tlat a, Nangin i tuifâwn po po chun i mi sukrinum ta a.

⁸Ka hmêlhriethai chu keia hlatah în umtir a, An ta dinga tirdakumtakah i mi siem ta a; Khârkhumin ka um a, ka suok thei naw a nih.

⁹Rinumna leiin ka mit a se tieu tieu a, Aw LALPA, ni tin ka ko che a, Nanga tieng ka kuthai ka phar a.

¹⁰Mithihai ta ding chun thilmak i thaw ding am a nih? Thi tahnunghai chun thoin an inpâk ding che am a nih?

¹¹I zainêmzie chu thlâna inhriettirin, I ringumzie chu Bohmangna hmuna inhriettirin a um ding am a nih?

¹²I thilmak thawhai chu inthimah inhriettirin a um ding am a nih? I felna chu theinghilna ramah hrietin a um bawk ding am a nih?

¹³Aw LALPA, kei ruok chun ka ko che a, Ka ṭawngṭaina chun zîngkâr tuok a ti che.

¹⁴LALPA, iengdinga ka hringna hi i thlauthlâk am a na? Iengdinga keia tienga i hmai i thup am a na?

¹⁵Ka naupangtea inthawk rinum tuor le, thi vâng vângin ka um hlak a, I thil râpthlâktakhai ka tuorin ka thaah a mi man hlak.

¹⁶I lunginsen nasatak chun a mi chîm tlum a, I thil râpthlâktakhai chun a mi sukbohmang ta a.

¹⁷Chuongchun, sûnnithlâkin tui angin an mi vêl a, An mîn huol vêl tâwl a,

¹⁸A mi hmangaitu le ka ruol chu a mi hlatah în umtir ta a, Ka hmêlhriethai chu inthimah în umtir ta bawk a.