Read Hmar INPÂKNA HLA BU 89 Bible Online

INPÂKNA HLA BU 89 - Hmar bible

INPÂKNA HLA BU 89

¹Ezra mi Ethan Maskil. LALPA ngilneina thuhai chu kumkhuoin hlaah sak ka ta, Ka bauin, i ringumzie chu suon po po chenin inhriettir ka tih.

²“Ngilneina chu kumkhuoa dingin remin um a ta, I ringumna chu vânahai ngei khin sukdet i tih,” ka ti ta a nih.

³Nang chun i hril ta si a; Ka mi thlang kuoma chun thu ka thlung a, Ka siehlaw David kuoma chun ṭawng kân khâm ta a,

⁴“I thlahai chu kumkhuoa dingin sukdet ka ta, I lalṭhungpha khawm suon po po chenin inngîr zing ka tih,” tiin.

⁵Aw LALPA, vânhai khin i thilmak thawhai hi inpâk an ta, Mi inthienghai inkhâwmnaa khin i ringumna hi inpâk bawk an tih.

⁶Vân dumhaia khin LALPA le hrilkhi thei ding tu am an um leh? Mi thilthawtheitak nauhai lai khin LALPA ang,

⁷Mi inthienghai inrâwn khâwmnaa Pathien ṭiumtak, A kâwlvêla mi po po nêka ṭitak ding chu tu am a um leh?

⁸Aw LALPA sipaihai Pathien, Aw JAH, nang anga mi hrât tu am an um a? I ringumna chu i vêlah a um si a,

⁹Nang chun tuipui so bur bur chunga khawm ro i rêl hlak a, A tuifâwn invawr sâng pha khawm i sukre hlak.

¹⁰Nang chun Rahab chu râl that angin i sukkawi dar vawng a, Nangma dotuhai chu i bân thahrâtin i sukdar ta vawng a.

¹¹Vânhai khi nanga ta a na, hnuoi khawm hi nanga ta a nih. Khawvêl le a sûnga thil um po po hi nangma inngîr a nih.

¹²Sim le hmâr chu nanga siem a na, Tabor le Hermon chun i hming leiin hlimin hla an sak hlak.

¹³Nang chun bân thilthawtheitak i nei a, I kut chu a hrât a, i kut changtieng chu chawimawiin a um a.

¹⁴Felna le rorêlna fel chu i lalṭhungpha innghatna a na, Ngilneina le thutak chu i hmaah an fe hlak,

¹⁵Ri hlimum hre hlak hnam chu an hamṭha ie, Aw LALPA, anni chu i hmêl varah an um hlak,

¹⁶I hming leiin sûnnithlâkin an hlim hlak a, I felna leiin chawimawiin an um hlak.

¹⁷Nang chu an hrâtna ropuina i ni si a, I ditsakna leiin kan ki hi chawimawiin um a tih.

¹⁸Kan phaw hi LALPA ta a ni si a, Kan lal hi Israelhai Mi Inthieng ta a nih.

¹⁹Chuong lai chun i mi inthienghai kuomah inlârnaah thu i hril a, “Mi pakhat hrâttak chunga chun ṭhangpuina kân nghat a, Mi pakhat, mihai laia inthawka thlang suok chu ka chawimawi ta a.

²⁰Ka siehlaw David chu ka hmusuok a, Ka hriek inthieng chun ama chu ka nâl ta a.

²¹Ka kut hi a kuomah sukdetin um a ta, Ka bân hin ama chu sukhrât a tih.

²²Dotu chun ama chu hnesie ngai naw ni a, Rîtlona nau khawmin ama sukrinum naw nih.

²³Ama dotuhai chu a hmaah vaw thlûng ka ta, Ama theidatuhai chu sawisâng ka tih.

²⁴Ama kuoma ruok chun ka ngilneina le ka ringumna chu um a ta, Ka hming leiin a ki chu chawimawiin um bawk a tih.

²⁵A kut chu tuipuia chun innghat ka ta, A kut changtieng chu vadungpuia hai chun.

²⁶Ama chun, ‘Nang chu ka pa, Ka Pathien, ka insandamna lungpui i nih,’ tiin mi ko a tih.

²⁷Chun, keiin ama chu nau lutîrah siem ka ta, Hnuoia lalhai lai chun a chunghnungtakah siem ka tih.

²⁸Ka zainêmna chu kumkhuoin a ta dingin kawl ṭhapêk ka ta, Ka thuthlung chu a kuomah um det a tih.

²⁹A chi thlahai chu kumkhuoin inumtir ka ta, A lalṭhungpha khawm chu vân um sûng ni chenin inumtir bawk ka tih.

³⁰A nauhai chun ka dân hi an nghatsan a, Ka rorêlnahai anga an um naw a,

³¹Ka thuruot an bawsiet a, Ka thupêk an kawl ṭha naw chun;

³²An bawsietnahai chu hmawl leh hung kan ka ta, An rîtlonahai chu vuokin hung kan ka tih.

³³Nisienlakhawm, ka ngilneina chu a kuoma inthawk chun lâkpêk vawng naw ning a, Ka ringumna chu khêla ân chang phal bawk naw ning.

³⁴Ka thuthlung chu bawse naw ning a, Ka hmûra thu suok chu sukdanglam bawk naw ning.

³⁵Vawi khat ka inthiengna sâlin kân khâm a, David kuomah khêl hril naw ningah.

³⁶A chithlahai chu kumkhuoin um an ta, A lalṭhungpha chu ka hmaah nisa angin um bawk a tih.

³⁷Thla angin kumkhuoa dingin sukdetin um a ta, Vân duma hretu ringum ang khin,” i ti a.

³⁸Nisienlakhawm, nang chun i thlauthlâkin i dit naw a, I hrieknâl chunga chun i lung a sen ta a.

³⁹I siehlaw thuthlung chu i tirdak a, A lallukhum chu hnuoia peithla hielin i suktlâwm ta a.

⁴⁰A dâi po po chu i sukthlûk a, A kulbînghai chu i suksiet ta a.

⁴¹Lampuia fe poin a thil an lâkpêk hlak a, A vêla mihai hrilsietin a hung um ta a

⁴²Ama dotuhai kut changtieng chu i chawimawi a, A hmêlmahai po po chu i sukhlim ta a.

⁴³Anih, a kâwlhnâm hmawrzum chu i namkâwi a, Ama chu inthawnaa chun în ngîrdettir ta naw a.

⁴⁴A ropuina chu i suktâwp a, A lalṭhungpha chu hnuoiah i pei thlâk ta a.

⁴⁵A tlangvâl lai nihai chu i suktâwipêk a, Ama chu muolphonain în khum ta si a.

⁴⁶Aw LALPA, ieng chen am în bihmang kumkhuo ding a na? Ieng chen am i lunginsen chu mei anga a chawk ding a na?

⁴⁷Aw, ka hun hi a tâwi dingzie hre zing la, Mihriem nauhai po po hi i va siem teplo ngei de!

⁴⁸Ieng mi am thi ni hmêl hmu lova hringa, Seol kuta inthawka hringna sanhim ding chu?

⁴⁹LALPA, tienlaia i lunginsietna, i ringumnaa David kuoma inkhâma i tiem kha, Khâwlai am a um ta a?

⁵⁰LALPA, i siehlawhai an hrilsietna chu hre zing la, Hnam hrâttakhai po po hrilsietna ka ângsûnga ka tuor hlakzie hi.

⁵¹Aw LALPA, nangma dotuhai hrilsietna, I hrieknâl kehnunghai an hrilsietna chu.

⁵²LALPA chu kumkhuoin inpâkin um raw se. Amen, Amen.