Read Hmar INPÂKNA HLA BU 90 Bible Online

INPÂKNA HLA BU 90 - Hmar bible

INPÂKNA HLA BU 90

¹(90—106) Pathien mi Mosie ṭawngṭaina. LALPA nang chu suon po po chena kan umna i ni hlak,

²Tlânghai insieng hmaa, Leihnuoi le khawvêl în ngîr hma khawm khan, Chatuona inthawka chatuon chenin nang chu Pathien i nih.

³Nang chun mihriem hi bohmangnaa în fetir hlak a, “Mihriem nauhai, kîr nâwk ro,” i ti hlak.

⁴Nanga ngai chun kum sâng khat hi, Zâni bo ta ang chau kha a na, Zân vêng khat sûng ang chau bawk a nih.

⁵Anni chu tui lien angin i lên hmang hlak a, ṭhang khat in ang chau an nih. Zîngkâr chun hlobet inder suok ang an nih.

⁶Zîngkâr chun a hung innoin a hung inder suok a, Zântieng chun ât thlûkin a um a, a vuoi hlak.

⁷I lunginsennaa sukbohmangin kan um a, I lungawi nawnaa suklungzîngin kan um bawk si a.

⁸Kan rîtlonahai chu i hmaah i sie a, Kan suol iprûkhai chu i hmêl varah i sie ta a.

⁹Kan dam sûng ni po po hi i lunginsennaah a bo hlak, Kan dam sûng kumhai hi tienami angin kan suktâwp hlak.

¹⁰Kan dam sûng kumhai chu kum sâwmsari a na, Hrâtna leiin kum sâwmriet khawm a ni thei. Nisienlakhawm, a sâwtna chu sininrimna le lungngaina chau a nih; A bo vak a, keini khawm kan vuong hmang hlak a ni hi.

¹¹Tuin am i lunginsenna thilthawtheizie hrea, Nangma ṭi dingzie anga i lunginsenna hrie le?

¹²Kan dam sûng nihai tiem dân ding mîn chûktir la, Varna lungril kan nei pha hielna dingin.

¹³Aw LALPA hung kîr nâwk la, ieng chen am i lunginsen ding a na? I siehlawhai chungthua chun i lungril inlêt rawh.

¹⁴Aw, zîngkâr chun i ngilneinain mi suktlai la, Kan dam sûng po po hin kan hlima kan lâwm theina dingin.

¹⁵Nangin i mi sukrimsik ni le, Thil ṭha naw kan tuok kum sûng hu ang khan mi suklâwm rawh.

¹⁶I sinthaw chu i siehlawhai kuomah inlang sienla, I ropuina chu an nauhai kuomah inlang raw se.

¹⁷Chun, LALPA kan Pathien mawina chu kan chungah um raw se: Kan kut sinthaw hi kan chungah sukdet bawk la, Anih, kan kut sinthaw hi sukdet rawh.