Read Hmar INPÂKNA HLA BU 92 Bible Online

INPÂKNA HLA BU 92 - Hmar bible

INPÂKNA HLA BU 92

¹Inpâkna Hla. Châwlni Hla. LALPA kuoma lâwmthu hril le, Aw Achunghnungtak, i hming inpâkna hla sak hi thil ṭhatak a nih;

²Zîngkâra i zainêmna suklang le, Zân tina i ringumna suklang hi,

³Thil sutthei hrui sâwm nei mi le, perkhuonghai, Ṭingṭang ri mi lungriem inthlâktir thei dâma suklang hi.

⁴LALPA, nang chun i sinthawin i mi suklâwm si a. I kut thilthawhai leiin hlimin hla sak ka tih.

⁵Aw LALPA, i thilthawhai chu a va ropui de! I ngaituonahai chu ân thûk êm êm a nih.

⁶Mi mâwl chun hi hi a hriet naw a; Mi invêtin a hrietthiem bawk nawh:

⁷Mi rilohai hlobet anga an hung inder a, Thil suksuoltuhai po po an hung inno hlut hlut hin, Kumkhuoa dinga sukbohmangin an um ding a hung ni hlak, ti hi.

⁸Aw LALPA, nang ruok chu kumkhuoa dinga insângtaka um zing i nih.

⁹Aw LALPA, ngai ta, nangma dotuhai hi, Ngai ta, nangma dotuhai hi an bohmang ding a nih; Thil suksuoltuhai po po hi sukdarin an um vawng ding a nih.

¹⁰Nisienlakhawm, ka ki hi ramsiel ki angin i chawimawi a, Hriek thara nâl ka ni tah.

¹¹Ka mitin ka hmêlmahai chunga ka duthusâm tlung chu a hmu tah, Ka na hin thil ṭha naw thawtu, a mi hung thawtuhai chunga ka duthusâm tlung ri chu a hriet tah.

¹²Mi fel chu intûm angin inno hlut hlut a ta, Lebanon tlânga sidar thing angin inṭhang duok duok a tih.

¹³LALPA ina phunhai chu, Ei Pathien biekin inhuonna tuol sûnga chun inno hlut hlut an tih.

¹⁴Tar hnung khawma la ra rawp an ta, Tuihnâng pâi ṭeuin hring hlut hlut an tih.

¹⁵LALPA chu mi indiktak a nih ti inlangtirna dingin, Ama chu ka lungpui a nih, amaa chun fel nawna hrim hrim a um nawh.