Read Hmar INPÂKNA HLA BU 94 Bible Online

INPÂKNA HLA BU 94 - Hmar bible

INPÂKNA HLA BU 94

¹Aw LALPA, nang phubalâkna thu neitu Pathien, Nang phubalâkna thuneitu Pathien, hung var suok rawh.

²Nang hnuoia rorêltu, thaw la, Chapohai chu an suol man thung rawh.

³ LALPA, mi rilohai chu ieng chen am, Mi rilohai chun hnein ieng chen am an hlim ding a na?

⁴Anni chu an ṭawng mei mei a, iniemtakin thu an hril a, Thil suksuoltuhai po po chu mâni an inpâk hlak.

⁵Aw LALPA, i mihai chu an suknâwi neng a, I rochan chu an sukrinum hlak.

⁶Hmeithai le mikhuol chu an sukhlum a, Pa neilo chu an that hlak.

⁷“LALPA chun hmu naw ni a, Jakob Pathien chun ngaituo bawk naw ni,” an ti hlak a nih.

⁸Mi laia mi ngawnghai ngaituo ro, Mi invêthai, iengtik am var in ti aw!

⁹Na inbûktu chun a hriet naw ding am a nih? Mit siemtu chun a hmu naw ding am a nih?

¹⁰Mihriem varna inchûktirtu le Hnam tin thununtu chun a kâwk naw ding am a nih?

¹¹ LALPA chun mihriem ngaituohai chu, Teplo mei mei a nih ti a hriet a.

¹²Mi i thunun a, i dân thua inthawka i inchûktir chu, Aw LALPA, a hamṭha.

¹³Mi rilo ta dinga khur choa a um hmakhat a, Lunginzîng nihaia châwlna i pêk theina dinga i închûktir chu.

¹⁴LALPA chun a mihai a pei thlâk âwm si naw a, A rochan chu mâksan bawk naw nih.

¹⁵Rorêlna chu felna tieng kîr nawk a ta, Lungril indiktak put po po chun chu chu zui an tih.

¹⁶Tu am thil ṭha naw thawtuhai mi thawpêk dingin tho a ta? Tu am thil suksuoltuhai mi thawpêk dingin ngîr a ta?

¹⁷LALPA chu a mi ṭhangpuitu ni naw sien la chu, Ka hringna hi hmun reah[22] a um vak ta ding a nih.

¹⁸“Ka ke ân tlêu ie,” ka ti khan, Aw LALPA, i ngilneina chun a mi kei a.

¹⁹Ka lungrila ngaituo tamtak ka nei lai chun, I thlamuonna chun ka hringna hi a sukthafân hlak.

²⁰Rîtlona lalṭhungpha, thuruota thil suksuolna siem hlaktu chun Inkawppuina che a nei ding am a nih?

²¹Mi fel hringna thaw tumin an pungkhâwm tâwl hlak a, Thisen demkailo chu thiemnaw an inchangtir bawk hlak.

²²Nisienlakhawm, LALPA chu ka kulbîng insâng a lo na, Ka Pathien chu ka înhumhimna lungpui a lo nih.

²³Ama chun anni suolna ngei chu an chungah ân tlâktir a, Anni ṭhat nawna ngeia chun sukbohmang a ta; LALPA ei Pathien chun sukbohmang a tih.