Read Hmar INPÂKNA HLA BU 95 Bible Online

INPÂKNA HLA BU 95 - Hmar bible

INPÂKNA HLA BU 95

¹Aw hung ta u, LALPA chawimawiin hlimtakin hla sak ei tiu; Ei insandamna lungpui chawimawiin hlimtakin khêk ei tiu.

²Lâwmthu hrilin a hmaah fêng ei tiu khai; Inpâkna hla saka ama chawimawiin hlimtakin râwl insuong ei tiu.

³LALPA chu Pathien ropuitak a ni si a, Pathien po po chungah Lal ropuitak a nih.

⁴Ama kuta chun hnuoi hmun inthûktakhai chu a um a, Tlâng sîp insângtakhai chu ama ta a ni bawk a.

⁵Tuisuoriet hi a ta a nih, ama siem a ni si a, Khawmuol khawm hi a kutsuok a nih.

⁶Aw hung unla, chibai bûkin kûn ei tiu, LALPA a mi Siemtu hmaah dingṭhaṭhuon ei tiu.

⁷Ama chu ei Pathien a na, Eini hi a ran tlatna hmuna mi le, a kuta berâmhai ei ni si a. Vawisûn hin a râwl chu lo hre ta ve unla chu aw!

⁸Meribaa an thaw ang khan in lungril sukngar naw ro, Thlalêra Massa ni ang khan;

⁹Chuong lai chun in thlatuhai chun an mi fie a, Ka thilthaw an hmu sa khawmin an mi fie a.

¹⁰Kum sâwm li sûng zet chu, chu suonhai chunga chun ka lungninaw a, “An lungrila ngaisuol hmang mi an na, Ka lampuihai khawm an hriet nawh,” ka ti a.

¹¹Chuleiin, “Ka châwlnaa chun lût naw ni hai,” tiin, Lunginsenin ṭawng kân khâm ta a.